Ўзбекистонда қизамиқ билан касалланганлар сони ортаётгани тўғрисида хабар тарқалди. Санитария-эпидемиологик осойишталик ва жамоат саломатлиги қўмитаси ҳолат юзасидан муносабат билдирди.
Маълум қилинишича, 2023 йилнинг ўтган даври мобайнида фаол олиб борилган эпидемиологик суриштирувлар натижасида республикада 37 нафар беморларда қизамиқ касаллиги тасдиқланган. 2022 йил якунида дунё бўйича 155 минг ҳолатда қизамиқ касаллиги рўйхатга олинган.
Қизамиқ касаллиги бўйича мураккаб эпидемик вазиятнинг олдини олиш мақсадида Ўзбекистонда 2022 йилнинг 16 ноябрь—30 декабрь кунлари 6 ойликдан 5 ёшгача бўлган болаларда қизамиқ-қизилчага қарши оммавий эмлашлар ўтказилди. Натижада режадаги 3 355 900 нафар боланинг 3 303 582 нафари ёки 98,4 фоизи эмлаш билан қамраб олинди ва ҳозирда ҳам эмлаш ишлари давом эттирилмоқда.
“Жаҳон соғлиқни сақлаш ташкилотининг (ЖССТ) қизамиқ ва қизилча касаллиги бўйича эълон қилинган маълумотларига кўра, ҳозирда дунёнинг 150 дан ортиқ мамлакатида мураккаб эпидемиологик вазият сақланиб турибди. Юқоридагилардан хулоса қилиб шуни айтиш мумкинки, ҳозирда республикамизда касалликка қарши барча зарур профилактик чоралар кўрилмоқда, эпидемик вазият барқарор ва тўлиқ назоратга олинган”, — дейилади хабарда.
Изоҳ (0)