“Беморларнинг 10-15 фоизида қизамиққа гумон бор”. Намангандаги юқумли касалликлар шифохонасидан репортаж

Ижтимоий тармоқларда Наманганда қизамиқ касаллиги авж олгани, шу туфайли касалхоналарда жой етишмаётгани ҳақидаги хабарлар тарқалди. “Дарё” мухбири Азизбек Абдувалиев вазиятга ойдинлик киритиш мақсадида вилоят юқумли касалликлар шифохонасида бўлди.

Шифохона 240 ўринга мўлжалланган бўлиб, бугунги кунда бу ерда 235 нафар бемор даволанмоқда. Улар орасида қизамиқдан ташқари ўткир респиратор касалликлар, менингит, ОИВ, сарамас ва диарея каби хасталикка чалинганлар ҳам бор.

Бу ерга олиб келинаётган беморларнинг 10-15 фоизини қизамиққа гумон қилинганлар ташкил этяпти. Уларга лаборатория таҳлилларидан кейингина бу ташхисни аниқ қўйиш мумкин. Чунки аломатлари ўхшаш бўлса-да, бошқа аллергик касалликлар ҳам бўлиши мумкин. Беморларни қабул қилиш учун жойларимиз ва дори-дармонларимиз етарли, — дейди шифохона бош шифокори Илҳомжон Тожибоев.

Касалхона палаталарини бош шифокор билан айланганимизда чиндан ҳам боласини жойлаштириш учун навбат кутаётганлар ёки бу ердаги шароитдан шикоят қилганларга дуч келмадик. Улар жойлашган палаталарда ҳарорат маромида, дори-дармонлар имкон қадар шифохона ҳисобидан берилмоқда.

Икки нафар фарзандим бор, икковининг ҳам тоби қочди, ҳарорати кўтарилди. Биз аввалига грипп деб ўйладик. Кейинчалик каттасида бу шамоллаш билан боғлиқ эканлиги маълум бўлди, кичигида эса қизамиқ аниқланди. Боламни бу ерга олиб келганимда ҳолати ёмон эди, ҳамма жойига тошмалар тошиб кетганди. Ҳозир анча яхшимиз, тез орада жавоб беришса керак, — дейди бемор боланинг онаси Нилуфар Убайдуллаева.

Қизамиққа чалинганлар орасида кичик ёшдаги болалар кўп. Буни расмий статистика ҳам тасдиқламоқда: вилоятдаги 255 нафар бемордан 62 фоизини 1 ёшгача, қолганларини эса 1 дан 3 ёшгача бўлган болалар ташкил этмоқда.

Жаҳон соғлиқни сақлаш ташкилоти ва Соғлиқни сақлаш вазирлиги тасдиқлаган эмлаш тақвими мавжуд, унга асосан болалар 1 ва 6 ёшда қизамиққа қарши эмланиши керак. Шунинг учун ота-оналардан болаларини эмлатишга бефарқ бўлмасликни сўраган бўлардим.Чунки касаллар асосан ё эмлаш ёшигача бўлганлар ёки эмланмаганлар бўлиб чиқяпти. Яна бундай касаллик авж олган пайтда омма кўп бўладиган жойларга бормаслик, кўп суюқлик ичиш ва гигиенага риоя этишни ҳам, — Илҳомжон Тожибоев.

Маълумот учун, жорий йилнинг 10 ойи давомида вилоятда жами 735 та қизамиқ касаллиги лаборатория текширувида тасдиқланган. Вилоят юқумли касалликлар шифохонасидан ташқари Бешкападаги болалар сиҳатгоҳида ҳам 100 та захира ўрни тайёрлаб қўйилган.