АҚШ 3 июль куни Эрон нефть экспортига қарши санкция жорий этди. Бу Исроил ва Эрон ўртасида ўт очишни тўхтатиш режими кучга кирганидан бери Теҳроннинг энергетика секторига қарши қўлланган биринчи жазо чораси бўлди. Бу ҳақда Al Jazeera хабар берди.
Санкция нишонига олинганлар орасида ироқлик тадбиркор Салим Аҳмад Саид ва унинг Бирлашган Араб Амирликларидаги компанияси мавжуд. АҚШ уни Эрон нефтини Ироқ нефти билан аралаштириб, контрабанда қилишда айбламоқда.
“Эроннинг хатти-ҳаракатлари мамлакатни барбод қилди. Тинчликни танлаш учун барча имкониятлар бўлган бўлса-да, мамлакат етакчилари экстремизмни танлади. Ғазначилик Теҳроннинг даромад манбаларини нишонга олишда давом этади ва иқтисодий босимни кучайтиради”, дейилади АҚШ молия вазири Скотт Бессент баёнотида.
АҚШ президенти Дональд Трамп ўт очишни тўхтатишга эришилгач, Хитой Эрон нефтини сотиб олиши мумкинлигини айтган. Шу билан у Теҳроннинг энергия экспортига нисбатан санкциялар бекор қилинишига ишора қилганди. Лекин ваъда узоққа чўзилмаган. Трамп ўтган ҳафта ижтимоий тармоқда Эрон олий раҳнамоси Али Хоманаийнинг ғалаба ҳақидаги баёнотига жавобан “санкцияларни юмшатиш бўйича барча ҳаракатларни дарҳол тўхтатганини” маълум қилган.
АҚШ президенти, шунингдек, Исроилни Хоманаийга суиқасд қилишдан тўхтатиб, уни “жуда жирканч ва жоҳилона ўлим”дан қутқариб қолганини айтган. Исроил мудофаа вазири Исраэл Кац мамлакат Хоманаийни ўлдирмоқчи бўлганини, бироқ суиқасд учун “оператив имконият бўлмаганини” билдирган.
Исроил 13 июнь кунидан бошлаб огоҳлантиришсиз Эронга ҳаво ҳужумлари уюштиришни бошлаган. Оқибатда ҳар иккала давлатнинг юзлаб тинч аҳолиси ва юқори мартабали ҳарбийлари ҳалок бўлган.
22 июнга ўтар кечаси Дональд Трамп АҚШ қуролли кучлари Эрондаги учта ядровий объект — Фордо, Натанз ва Исфаҳонга муваффақиятли ҳужум уюштирганини маълум қилган. У Теҳрон можарони тўхтатишга рози бўлиши кераклигини таъкидлаган. Сўнгра Трамп 24 июнь куни Исроил ва Эрон ўртасида ўт очишни тўхтатиш режими кучга кирганини эълон қилган.
Изоҳ (0)