Пентагон раҳбари Ллойд Остиннинг маълум қилишича, Эрон “тажовузкор ҳаракат”ни амалга ошириб турган бир вақтда Қўшма Штатлар Исроилни қўллаб-қувватлашда давом этади.
Остиннинг сўзларига кўра, Яқин Шарқда жойлашган Америка қўшинлари “Эрон томонидан Исроил томон учирилган кўплаб ракеталарни тутиб олган”.
“Биз Эроннинг бу даҳшатли тажовузкор ҳаракатини қоралаймиз ҳамда у қўллаб-қувватлаётган террористик гуруҳларни кейинги ҳужумлардан тийилишга чақирамиз”, деди АҚШ мудофаа вазири.
Унинг таъкидлашича, Қўшма Штатлар “ўз халқини ҳимоя қилиш, Исроил мудофаасига қўшимча ёрдам кўрсатиш ва кескинлашувнинг олдини олиш учун муҳим имкониятларга эга”. Пентагон матбуот хизмати, шунингдек, Остиннинг Исроил мудофаа вазири Йоав Галант билан телефон орқали мулоқот қилгани, унинг давомида Эрон ракета ҳужуми оқибатлари муҳокама қилингани ҳақида хабар берган.
Аввалроқ Исроил ҳарбий ҳаракатларга сарфлаш учун АҚШдан 8,7 миллиард долларлик ёрдам пакетини олиши ҳақида хабар берилган эди.
Аниқлик киритилишича, ёрдам пакети асосий ҳарбий харидлар учун 3,5 миллиард доллар ва ҳаво ҳужумидан мудофаа тизимлари, шунингдек, илғор лазер тизими учун 5,2 миллиард долларни ўз ичига олади.
Изоҳ (0)