Ижтимоий тармоқларда фуқаро ички ишлар органлари ходимига қаршилик кўрсатаётгани акс этган видео тарқалиб, турли муҳокамаларга сабаб бўлмоқда. Мазкур ҳолат юзасидан ИИББ маълумот берди.
Унга кўра, 21 июнь куни соат 14.30 ларда Учтепа тумани, 31-мавзеси ҳудудида икки нафар фуқаро тортишиб қолган ва томонлар ўзаро жанжаллашиб кетган. Жанжал вақтида фуқаро У.М. ўткир тиғли жисм билан фуқаро Н.Т.га тан жароҳати етказган ҳамда ҳодиса жойидан яширинган. Натижада жабрланувчи чап кўкрак қисмининг санчилган-кесилган жароҳати ташхиси билан шифохонага жойлаштирилган.
Ҳодиса жойига етиб келган ҳудудий профилактика инспектори О.Абдуллаев мазкур жиноятни содир этган шахсни ушлаш чораларини кўрган вақтида, У.М. унга ҳам пичоқ билан тажовуз қилиб, фаол қаршилик кўрсатган.
Кўрилган чора-тадбирлар натижасида гумонланувчи далилий ашё (Н.Т.га тан жароҳати етказган пичоқ) билан профилактика инспектори ва ППХ ходимлари томонидан қўлга олинган ҳамда терговга жалб қилинган.
ИИО ходимлари тан жароҳати олмаган. Мазкур ҳолат юзасидан Учтепа тумани ИИО ФМБ ҳузуридаги Тергов бўлими томонидан Жиноят кодексининг 105-моддаси 2-қисми “м” банди (қасддан баданга ўртача оғир шикаст етказиш қуролни ёки совуқ қурол сифатида фойдаланилиши мумкин бўлган ашёларни ишлатиб содир этилган бўлса) билан жиноят иши қўзғатилиб, дастлабки тергов ҳаракатлари олиб борилмоқда.
Тергов якуни бўйича қонуний қарор қабул қилиниши таъминланади.
Тошкент вилоятининг Чиноз туманида 17 ёшли йигит ўзининг синфдоши томонидан пичоқлангани, Шаҳрисабзда эса собиқ ИИБ ходими қишлоқдоши томонидан пичоқлаб ўлдирилгани хабар берилганди.
Шунингдек, Қашқадарё вилоятининг Китоб туманида ҳоким ёрдамчиси пичоқлаб, ўлдирилгани хабар қилинган.
Изоҳ (0)