Республика шошилинч тез ёрдам илмий маркази Андижон филиалида фуқаро шифокорларга пичоқ билан тажовуз қилгани ҳақида хабар берилган эди. Бош прокуратура матбуот хизматининг хабар беришича, ушбу фуқарога нисбатан жиноят иши қўзғатилиб, тергов ҳаракатлари олиб борилмоқда.
Соғлиқни сақлаш вазирлиги матбуот хизматининг хабар беришича, ушбу воқеа 29 февраль куни юз берган.
Қайд этилишича, республика шошилинч тиббий ёрдам илмий маркази Андижон филиалининг Травматология бўлими қабулхонасига 2001 йилда туғилган М.Ф. исмли аёл бемор юз-кўзидан жароҳат олиб мурожаат қилган. Бемор шифокорлар кўригидан ўтаётганда турмуш ўртоғи томонидан калтакланганини айтган.
«Ўрнатилган тартибга кўра, ўзгалар томонидан жароҳат олган ҳолат мавжуд бўлса, тиббиёт ходими ҳуқуқни муҳофаза қилиш органларига тезкор хабар бериши шарт. Акс ҳолда жиноят яширганлик ҳолати билан жавобгарлик тортилиши мумкин. Шунга мувофиқ, шифокор Т.У. зудлик билан мазкур ҳолат юзасидан Ички ишлар бўлимига хабар беради», — дейилади хабарда.
Хабар берилганлигидан норози бўлган бемор аёлнинг эгизак укаси М.Х. исмли шахс эътироз билдиради. Шифокор унга ўрнатилган тартибни тушунтиргандан сўнг, беморнинг укаси шифокорни уятли сўзлар билан ҳақорат қила бошлайди. Шифокор унга сўкинмаслигини айтади. Улар орасида тортишув М.Х.нинг пичоқ орқали шифокорга тажовуз таҳдиди билан давом этади. Атрофидаги бир нечта одамлар М.Х.ни агрессив ҳолатдан қайтаришга уринади. Аммо у ҳаракатларини давом эттириб, пичоқни шифокор томонга отиб юборади. Бироқ ушбу пичоқ атрофдаги бошқа шахсга тегади. Бемор яқинлари ва атрофдаги бошқа шахслар томонидан М.Х мажбуран тинчлантирилиб, қабулхонадан олиб чиқиб кетилади.
Эри томонидан калтакланган аёл М.Ф. эса «Бош мия ёпиқ жароҳати, бош мия чайқалиши, жағ суяклари синиши, ёноқ, бош, юз, қорин, оёқ ва қўллар юмшоқ тўқималари жароҳати» ташхиси билан мазкур филиалнинг нейрохирургия бўлимида жорий йил 4 март кунига қадар даво муолажаларини олади.
Мазкур ҳолат юзасидан Андижон шаҳар прокуратураси томонидан 10 март куни Жиноят кодексининг 219-моддаси (Ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилган ва фуқаро М.Х. процессуал тартибида ушланган.
Изоҳ (0)