Toshkent viloyati Chinoz tumani “Yallama” qishlog‘ida 17 yoshli yigit o‘z sinfdoshi tomonidan pichoqlab o‘ldirildi. Bu haqda “Millar” dasturida xabar berildi.

Maʼlum bo‘lishicha, holat joriy yilning 6-iyun kuni tunda, futbol maydonida ro‘y bergan. Onasining so‘zlariga ko‘ra, yigit o‘sha kuni unga telefon qilib, o‘rtoqlari bilan ovqatlanishga borish uchun ruxsat so‘ragan.

“Ruxsatsiz hech qayerga chiqmasdi. Otasiz katta qilayotgan edim. Meni bolamni nega o‘ldirdi”, deydi ayol.

Marhumning tog‘asi qotillikda gumonlanayotgan bolaning oilasi yomon oila emasligini, voqea sababini esa bilolmayotganini aytgan.

“Shifoxonada ko‘rganim ko‘z oldimdan ketmayapti. Bola ko‘zini yummagan ham. Ko‘mgunimizgacha ko‘zini yummadi. To‘ymadi hayotga. Yangi mashinalar minmadi, tobut minib ketdi”, deydi marhumning tog‘asi.

Chinozda avj olayotgan jinoyatlar

19-mart kuni Toshkent viloyati Chinoz tumanida 25 yoshli erkak xotini va qaynanasini o‘ldirgani haqida xabar berilgandi. Mazkur tumanda shuningdek, 14-fevral kuni uka o‘z opasini o‘ldirib, 7 kun uyda saqlagan edi. Bundan tashqari, Chinoz tumanida o‘qituvchi 7-sinf o‘quvchisining boshini devorga bir necha bor urib, jarohat yetkazgandi. 

O‘quvchilar o‘rtasida mushtlashuvlar

2022-yilning oktyabrida ijtimoiy tarmoqlarda Namanganning Kosonsoy tumanida maktab o‘quvchilari mushtlashuvi aks etgan tasvirlar tarqalgandi. Noyabrda esa Toshkentda o‘quvchilar futboldagi janjal sabab mushtlashib ketgan edi. Keyinroq poytaxt IIBB voqeaga munosabat bildirib, mazkur holat yuzasidan Yangihayot tumani IIO FMB tomonidan tekshiruv o‘tkazilayotganini ma’lum qilgan.

Shuningdek, Toshkentda maktab o‘quvchilari “Amerika kinosiga taqlid qilib” mushtlashuv uyushtirgani, Xorazm viloyati Urganch tumanida joylashgan ikki maktab o‘quvchisi o‘rtasida janjal sodir bo‘lgani to‘g‘risida xabar berilgandi.

2023-yilning iyun oyida Toshkent shahar Yunusobod tumanida joylashgan maktablarning birida o‘quvchi yigit bir necha tengdoshlari tomonidan kaltaklangandi.