Бухорода ИИО томонидан тадбиркор ва унинг оиласига тажовуз қилмоқчи бўлганлар ушланди. Бу ҳақда вилоят ИИБ ахборот хизмати раҳбари Шуҳрат Жалолов «Дарё»га хабар берди.
Ўзбекистон Ички ишлар вазирлиги, Давлат хавфсизлик хизмати, вилоят Ички ишлар бошқармаси, ДХХ вилоят бошқармаси ҳамда вилоят прокуратураси ҳамкорлигида, олинган тезкор маълумотлар асосида кенг қамровли тадбир ўтказилган.
Натижада бухоролик тадбиркор ва унинг оила аъзоларига нисбатан қурол қўллаб, ҳаёт ёки соғлиқ учун хавфли бўлган зўрлик ишлатиш йўли билан унинг катта миқдордаги пул маблағлари ва тилла буюмларини босқинчилик йўли билан эгаллашни режа қилган жиноий гуруҳ аъзолари ушбу мудҳиш жиноятни содир этишга тайёргарлик босқичида қўлга олиниб, ўта оғир турдаги босқинчилик жинояти содир этилишининг олди олинди.
Жиноий гуруҳ аъзолари қўлга олинган вақтда бир дона ПМ жанговар қуроли ҳамда унинг 6 дона жанговар ўқи ва бир дона совуқ қурол ҳисобланган ўткир тиғли пичоқ ашёвий далил сифатида тегишли тартибда ҳужжатлаштириб олинган.
Мазкур ҳолат юзасидан Бухоро вилояти Ички ишлар бошқармаси Тергов бошқармаси томонидан Жиноят кодексининг 25, 164-моддаси 3-қисми «в» банди (уюшган гуруҳ томонидан ёки унинг манфаатларини кўзлаб содир этилган босқинчилик) ва 248-моддаси 3-қисми (қурол, ўқ-дорилар, портловчи моддалар ёки портлатиш қурилмаларига қонунга хилоф равишда эгалик қилиш) билан жиноят иши қўзғатилиб, гумон қилинувчилар Ўзбекистон Жиноят процессуал кодексининг 221-моддаси тартибида ушланган ҳолда дастлабки тергов ҳаракатлари олиб борилмоқда.
Бундан аввал Фарғонада юзига ниқоб тақиб, дорихоналарда босқинчилик содир этган шахслар ушлангани, Фарғонада хонадонга бостириб кириб, уй эгаларига тан жароҳати етказган ниқобли босқинчилар қўлга олингани ҳамда Фарғонада хонадонларнинг бирига бостириб кириб, эр-хотинга ҳужум қилган шахслар ҳодиса жойида қолдириб кетилган куртка сабаб топилгани ҳақида хабар берилганди.
Изоҳ (0)