Сирдарёнинг Сайҳунобод туманида 4 июнь куни 6 нафар маст фуқаро тез ёрдам ходимларини сабабсиз калтаклагани хабар берилган эди. Соғлиқни сақлаш вазирлиги бу масала юзасидан бош прокурорга мурожаат йўллади.
Вазирликнинг қайд этишича, воқеа оқибатида 28 ёшли шифокор Ж.О. «Бош мия чайқалиши, ўнг қош соҳаси йиртилган жароҳати, ўнг қовоқ соҳаси гематомаси, кўкрак соҳаси юмшоқ тўқималари лат ейиши» ташхиси билан, 44 ёшли фелдшер B.Н. эса «Бош мия чайқалиши, юз соҳаси, чакка соҳалари юмшоқ тўқималарининг лат ейиши, ўнг қўл кафт суяги асосидан ёпиқ синиш» ташхиси билан Сайхунобод туман тиббиёт бирлашмаси шошилинч тез ёрдам бўлимига ётқизилган.
«Тиббиёт ходимларига нисбатан тажовузкор ҳаракатлар содир этишаётгани жуда ачинарли ва буни ҳеч қанақасига оқлаб бўлмайдиган ҳолатдир», — дейилади хабарда.
Шу сабабли мазкур ҳолат юзасидан Соғлиқни сақлаш вазири бош прокурорга мурожаат йўллади. Унда юқорида қайд этилган ҳолатни назоратга олган ҳолда, айбдор шахслар қаттиқ жавобгарликка тортилишини таъминлашда амалий ёрдам сўралди.
Изоҳ (0)