Украинага гуманитар ёрдам йиғиш ва украиналикларни уруш зонасидан эвакуация қилишга ёрдам берган россиялик фаол 20 июнь куни Москва ҳарбий суди томонидан 22 йиллик қамоқ жазосига ҳукм қилинди. Бу ҳақда Arab News хабар берди.
Надин Гейслер номи билан танилган Надежда Россинская “Гўзаллар армияси” деб номланган гуруҳни бошқарган. У 2022—2023 йилларда Украинанинг Россия назорати остидаги қисмларида 25 мингга яқин одамга ёрдам берган.
Расмийлар Гейслерни 2024 йил февраль ойида ҳибсга олган. Кейинчалик у Instagram’да Украинанинг “Азов” батальонига хайрия қилишга чақирган пости учун давлатга хиёнат ва террорчилик фаолиятига ёрдам беришда айблаган. Гейслер буни рад этган ва унинг адвокати у пост муаллифи эмаслигини билдирган.
Прокурорлар 20 ёшни қаршилаган Гейслер учун 27 йил сўраганди. “Медиазона” нашрининг ёзишича, у суддан ўзини 27 йил ва бир кунга қамоққа олишни сўраган. Шунда унинг қамоқ муддати 2023 йилда уруш тарафдори бўлган блогерни ўлдирган бомбани етказиб бергани учун қамоққа ташланган россиялик Даря Трепованинг қамоқ муддатидан ошиб кетади. Треповага 2024 йили чиқарилган ҳукм замонавий Россия тарихидаги энг узоқ муддатли ҳукм бўлганди.
Россияда 3 йил олдин Украинада кенг кўламли уруш бошланганидан бери терроризм, жосуслик ва хорижий давлат билан ҳамкорлик учун жиноий жавобгарлик кескин ошган. Россиянинг “Первй Отдел” адвокатлар уюшмаси 2024 йилда бундай жиноятлар учун 359 киши судланганини айтган.
Изоҳ (0)