Ўзбекистонда экология бўйича ҳуқуқбузарларга 115 млрд сўм маъмурий жарималар белгиланди, деб хабар бермоқда Экология вазирлиги.
Қайд этилишича, Экология, атроф-муҳитни муҳофаза қилиш ва иқлим ўзгариши вазирлигининг Давлат экологик назорат инспекцияси томонидан экология ва атроф-муҳитни муҳофаза қилиш соҳасидаги қонунчилик талаблари бузилишининг олдини олиш, уни аниқлаш ва чек қўйиш мақсадида кўплаб ишлар амалга оширилмоқда.
Хусусан, 2023–2024 йиллар ва 2025 йилнинг 5 ойи давомида ҳуқуқни муҳофаза қилиш органлари билан биргаликда 3500 дан ортиқ рейд тадбирлари амалга оширилди. 250 мингдан ортиқ корхона ва фуқароларга соҳага оид профилактика тадбирлари ўтказилди. Шундан соҳага оид қонунчилик талабларини бузган 110 941 нафар шахс аниқланиб, уларга 115 млрд сўм маъмурий жарималар белгиланди ва 32 млрд сўм табиатга етказилган зарарлар бўйича даъво қўзғатилди, шундан жами 66 млрд сўм маблағ ундириб олинди.
2023‒2025 йиллар давомида жами 5439 та хўжалик юритувчи субъектлар фаолиятида табиатни муҳофаза қилиш тўғрисидаги қонунчилик ижроси юзасидан Бизнес-омбудсманни хабардор этган ҳолда текширувлар ўтказилди. Текширувлар давомида 3433 та турли хил қонунбузилиш ҳолатлари аниқланиб, 1738 нафар мансабдор шахсга маъмурий баённомалар расмийлаштирилиб, суд органларига тақдим этилди.
Шу билан бирга, камчиликларни бартараф этиш юзасидан 4669 та мажбурий экологик кўрсатмалар берилиб, 322,3 млрд сўм табиатга етказилган зарар ва атроф-муҳитни ифлослантиргани учун 60,3 млрд сўм қўшимча компенсация суммалари ҳисобланди. 245 та корхона фаолияти камчиликлар бартараф этилгунга қадар вақтинчалик тўхтатилди.
Президентнинг 2023 йил 31 майдаги фармони асосида Бош прокуратура тузилмасида экология, атроф-муҳитни муҳофаза қилиш ва ўрмон хўжалиги соҳасидаги қонунчилик ижроси устидан назорат бошқармаси ташкил этилган бўлиб, бугунги кунда ушбу бошқарма билан ҳамкорликда экологик жиноий ҳуқуқбузарликларга қарши амалий ишлар олиб борилмоқда.
Жумладан, сўнгги уч йилда 982 млрд сўмлик 429 та жиноий иш ҳужжатлари (шундан 2023 йилда 171 та, 2024 йилда 172 та ва 2025 йилнинг биринчи чорагида 86 та) прокуратура органларига қонуний чора кўриш мақсадида тақдим этилган бўлиб, шундан 275 та ҳолатда ҳуқуқбузарларга жиноий иши қўзғатилган.
Рейд тадбирлари давом эттирилмоқда.
Ўрмон ва яшил ҳудудларни кўпайтириш, чўлланишга қариши курашиш агентлиги ташкил этилади. Давлат ўрмон хўжаликлари томонидан етказиб берилаётган кўчатлар ҳажми 2 бараварга оширилади. “Яшил макон” электрон платформасида очиқлик янада таъминланади. Ўрмон фондига кирмайдиган дарахт ва буталарнинг қимматбаҳо навларини қонунга хилоф равишда кесган ёки йўқ қилган шахслар томонидан компенсация сифатида экилган дарахт ва бута кўчатлари ҳисобини юритиш тизимини жорий қилинади.
Изоҳ (0)