Бухоро вилоятида бир туп дарахтга шикаст етказган фуқаро 9,5 миллион сўм тўлайдиган бўлди. Бу ҳақда вилоят Экология бошқармаси ахборот хизмати хабар берди.
Унга кўра, Бухоро шаҳар “Ҳавзинав” маҳалласида яшовчи фуқаро Х.Б. ўзи яшайдиган маҳалла ҳудудидан 1 туп манзарали айланта дарахтини ўсишдан тўхтамаслик даражасигача шикаст етказган. Ушбу ҳолат юзасидан дарахтга шикаст етказган фуқаронинг маҳалладошлари Бухоро шаҳар бўлими инспекторларига мурожаат қолдирган.
Мурожаатни олган шаҳар инспекторлари айтилган манзилга бориб, жойида ўрганди. Ҳақиқатдан ҳам 1 туп айланта дарахтига шикаст етказилгани аниқланди. Ҳуқуқбузар фуқарога нисбатан Маъмурий жавобгарлик тўғрисидаги кодекснинг 79-моддаси 1-қисми билан 8 500 000 сўм жарима ҳамда табиатга етказилган зарар 1 020 000 сўм ҳисобланди.
Бундан аввал Хоразмда 4 туп павловния дарахтини кесган шахс 27 млн сўмдан ортиқ жаримага тортилганди. Шунингдек, Сурхондарёда автомобиль йўлларини реконструкция қилишда қарийб 9,5 минг туп дарахт кўчирилиши мумкинлиги айтилганди.
Изоҳ (0)