Россиянинг Су-57Э бешинчи авлод кўп мақсадли қирувчисининг илк хорижий харидори маълум бўлди. Жазоир руслардан номаълум сонда қирувчилар сотиб олиб, 2025 йилдан фойдаланишга киритади. Бу ҳақда “ТАСС” агентлигига таяниб халқаро нашрлар ёзмоқда.
Маълум қилинишича, жазоирлик учувчилар Россияда махсус тайёргарликни аллақачон бошлаб юборган. Олтита бирликдан иборат дастлабки партия 2025 йил охиригача етказиб берилиши кутилмоқда. Бу битим ҳақида илк бор “Рособоронекспорт” томонидан 2024 йилги Аиршоw Чина кўргазмасида маълум қилинган, бироқ на харидор, на келишув қиймати очиқланганди.
Су-57Э — бу Sukhoi конструкторлик бюроси томонидан ишлаб чиқилган Су-57 қирувчисининг экспорт варианти ҳисобланади. Самолёт 2000 йиллар бошида ПАК ФА (Фронтал авиациянинг истиқболли мажмуаси) дастури доирасида ишлаб чиқилган бўлиб, илк парвозини 2010 йил 29 январда амалга оширган. Серияли ишлаб чиқариш Комсомолск-Амурдаги авиация заводи томонидан 2019 йилда бошлангани айтилади.
Ўша йили имзоланган давлат шартномасига кўра, 2028 йилга қадар Россия аэрокосмик кучларига 76 та Су-57 қирувчилари етказилиши кўзда тутилган. Бу маҳаллий стандартлар бўйича учта полкни жиҳозлаш учун етарли ҳисобланади. Серияли самолётларнинг биринчиси 2020 йил декабрь ойида хизматга топширилган. 2023 йил охирига келиб, шу жумладан, прототиплар билан бирга жами 22 та самолёт конвеердан чиққан.
Ишлаб чиқариш билан параллел равишда модернизация жараёнлари ҳам давом этмоқда. “Изделие 30” двигатели устида изланишлар бунга мисол бўла олади. Шу кунгача ишлаб чиқарилган қирувчилар Су-35 да қўлланган эски двигателларда парвоз қилар эди. 2027 йилга қадар янги технологияни серияли моделлар билан интеграция қилиш режалаштирилган.
Су-57Э бешинчи авлод қирувчи самолётларига хос хусусиятларга эга: радарларда сезувчанликнинг пастлиги, суперманёвр қобилияти ва қуролларнинг ички бўлмада сақланиши кабилар шулар жумласидан. Самолёт турли вазифаларни мураккаб жанговар шароитларда бажаришга мўлжалланган бўлиб, ҳар қандай об-ҳавода фаолият кўрсатиши мумкин. Максимал парвоз оғирлиги 35,5 тоннани, ички ёнилғи захираси эса 11 тоннани ташкил этади. Самолёт 20 000 метр баландликка кўтарилиши, соатига 2 600 километр масофани босиб ўтиши мумкин.
Қирувчи кабинаси бир ўриндиқли бўлиб, замонавий интеграциялашган дисплей тизими, кислород ишлаб чиқариш тизими ҳамда “НПП Звезда” томонидан ишлаб чиқилган катапульта ўриндиғи билан жиҳозланган. У учувчининг вазни ва парвоз шароитларига қараб автоматик созланади.
Қурол-яроғ масаласига келганда, у 7 500 кг гача бўлган оғирликдаги юкни кўтариши мумкин. Улар олтита ички ва ўн иккита ташқи осма пунктларга тақсимланади. Ички бўлинмаларда ҳаво жанглари учун Р-77М ва Р-74М2, ерусти нишонлари учун эса Кҳ-69 ва Гром-Э1 каби юқори аниқликдаги ракеталар сақланади. Шунга қарамай, аксар экспертлар унинг бешинчи авлодга хослигига шубҳа билдиради. Бунга асосий сабаб унинг ниҳоятда йирик ҳажми, стелс қопламасининг йўқлиги ва эски намунадаги двигателдир.
Изоҳ (0)