Мисрда Ўзбекистон технологиялари асосида трактор ишлаб чиқариш лойиҳаси амалга оширилади, деб хабар бермоқда “Дунё” АА.
Келтирилишича, Ўзбекистон элчихонаси кўмагида Мисрда Tanta Motors компанияси ва Ўзбекистоннинг AgroTex Klaster корхонаси вакиллари ўртасида онлайн музокаралар ташкил этилди.
Учрашувида икки томонлама ҳамкорликни йўлга қўйиш истиқболлари, шунингдек, уни янада ривожлантириш йўналишлари муҳокама қилинди. Ўзбекистонда ишлаб чиқарилаётган қишлоқ хўжалиги техникаларининг юқори сифати ва рақобатбардошлигига эътибор қаратилди.
Хориж томони қишлоқ хўжалигини механизациялаш, қўшма лойиҳаларни амалга ошириш, Мисрда Ўзбекистон технологиялари асосида трактор ишлаб чиқаришнинг тўлиқ циклини ташкил этиш, шунингдек, Африка бозорларига мазкур маҳсулотларнинг экспортини йўлга қўйиш каби йўналишларда ҳамкорлик қилишдан манфаатдор эканини билдирди.
Ҳамкорлик алоқаларининг амалий босқичларини муҳокама қилиш мақсадида шу йилнинг июль ойида AgroTex Klaster ишчи гуруҳининг Мисрга сафарини ташкил қилишга келишиб олинди.
Маълумот учун, Tanta Motors компанияси 1950 йилда ташкил топган. У Мисрда қишлоқ хўжалиги техникасини ишлаб чиқарувчи етакчи хусусий корхоналардан биридир. Мазкур компания кичик ҳажмдаги тракторлардан тортиб, турли қишлоқ хўжалиги техникаси, жиҳоз ва ускуналаргача ишлаб чиқаради. Tanta Motors маҳсулотлари Африка, Европа ва Яқин Шарқнинг 20 дан зиёд мамлакатларига экспорт қилинади.
2024 йил 21 август куни Ўзбекистон Олий Мажлис Сенати ва Миср араб республикаси Сенати ўртасидаги ҳамкорликни мустаҳкамлаш мақсадида парламентлараро дўстлик гуруҳларининг биринчи видео мулоқоти бўлиб ўтганди. Мулоқот давомида икки давлат раҳбарлари ўртасида эришилган олий даражадаги келишувларнинг ижросини таъминлаш мақсадида тизимли парламент назоратини ўрнатиш борасида келишувга эришилганди.
Изоҳ (0)