Андижон вилоятининг Шаҳрихон туманида яшовчи И.А. 50 нафар жиззахлик педагогни DTМдаги танишлари орқали малака аттестациясидан ўтказишни ваъда қилган. Бу ҳақда Жиззах вилояти ИИБ хабар берди.
Маълум қилинишича, фуқаро муаллимлардан пул талаб қилган. Гумон қилинувчи Шароф Рашидов туманидаги мактаблардан бирининг ўқитувчиси Г.У.дан 25 минг доллар ҳамда 30 млн сўм олган вақтида ушланди.
Ҳолат юзасидан суриштирув ўтказилмоқда.
Аттестациядаги қинғирликлар
Қорақалпоғистонда таълим соҳасида порахўрлик ортидан уч кишига жиноят иши қўзғатилгани хабар қилинганди. Мактабгача ва мактаб таълими вазирлиги қайд этишича, 2024 йил январдан бошлаб мактабгача, умумий ўрта ва мактабдан ташқари таълим ташкилотларининг педагог кадрлари аттестациясиМактабгача ва мактаб таълими вазирлиги томонидан ўтказиб келинмоқда.
Қайд этилишича, айрим педагоглар томонидан турли қинғир йўллар билан тоифа олишга уриниш ҳолатлари ҳам учраб турибди. Ўтган малака синовларида турли тақиқланган воситалар, хусусан алоқа воситаларидан фойдаланиш ҳолати бўйича 200 дан ортиқ номзодлар синовлардан четлаштирилган.
Хусусан, жорий йилдаги синовларда республика бўйича жами 79 нафар, шу жумладан 68 нафари алоқа қурилмаларидан фойдалангани сабабли жараёндан четлаштирилди.
Айримлар эса, фирибгарлик йўли билан тестдан ўтказиб қўйишни ваъда қилиб, педагоглар ишончига кирмоқда, улардан пул олиб жиноятга қўл уриш ҳолатлари ҳам учраяпти.
Изоҳ (0)