Болалар омбудсмани Жиззах вилоятидаги мактабда таҳсил олаётган 1-синф ўқувчиларига стул кўтартириб қўйилиши юзасидан маълумот берди.
Аниқланишича, 22 апрель куни Зарбдор туманидаги 5-сонли умумтаълим мактабда 1-“А” синфга ўтилаётган инглиз тили дарсида ўқитувчи Р.Т. (1999 йилда туғилган) ўқувчилардан уйга берилган вазифаларни сўраган. Олти нафар ўғил ва етти нафар қиз болани дарсга тайёргарлик кўрмасдан келгани туфайли гўёки тарбиявий чора деб синф хонасидаги ўзлари ўтирган стулларни кўтаришга мажбур қилган.
Ушбу ҳолатни ўзининг телефон аппаратида видео тасвирга олиб, Telegram ижтимоий тармоғи орқали шу мактабнинг ота-оналар гуруҳига юборган.
Ҳозирда мазкур ҳолат юзасидан Зарбдор тумани ИИБ томонидан терговга қадар текширув ҳаракатлари олиб борилмоқда.
Болаларга нисбатан турли шаклдаги зўравонлик ёки зўравонликка таянган тарбия чораларини, жумладан, ғайриинсоний ёки қадр-қимматни камситувчи муомала ҳамда жазо турларини қўллаш қонунан тақиқланган ва тегишли жавобгарликка асос бўлади. Болалар омбудсмани бу ҳолат бўйича болалар манфаатлари юзасидан ўз кузатувини давом эттиради, — дейилади хабарда.
Аввалроқ Бухоро вилоятида 15 яшар қиз соғлом бўлса-да, руҳий-асаб касалликлар диспансеридан олиб кетилмаётгани айтилганди. Шунингдек, самарқандлик қиз болалар омбудсманига мурожаат қилиб, Қашқадарёдаги хонадонларнинг бирида аёл уни фоҳишаликка мажбурлаганини маълум қилган эди.
Изоҳ (0)