“Юксалиш” умуммиллий ҳаракати томонидан мактабларда янги ўқув йили бошланишидан олдин ўқитувчиларнинг мажбурий меҳнатга жалб қилиниши ва улар томонидан мактаб таъмири ва бошқа харажатларни ўз ҳисобидан амалга оширишга тўғри келгани ҳолатлари аноним сўров асосида ўрганилди.
Сўровномада бутун республика бўйлаб жами 5 745 нафар мактаб ўқитувчи ва мураббийлари иштирок этган. Респондентларнинг 1 878 нафари эркак (32,7 фоиз) ва 3 867 нафари аёл (67,3 фоиз) педагогларни ташкил қилган.
Сўровномада ёзги таътил даврида мажбурий меҳнатга жалб қилингани тўғрисидаги саволга иштирокчиларнинг аксарияти (92,3 фоизи) таътил давомида мактаб раҳбарияти томонидан ишга чақирилмаганини таъкидлаган. Бироқ респондентлар орасида таътил давомида мажбурий меҳнатга жалб қилинганлари ҳам бор (7,7 фоиз).
Шунингдек, сўровноманинг яна бир асосий масалаларидан бири “Янги ўқув йилига тайёргарлик жараёнида ўз шахсий маблағлари ҳисобидан харажат қилишига тўғри келдими?” деган савол бўлди. Ушбу саволга респондентларнинг 4 987 нафари (86,8 фоизи) қўшимча харажат қилишга тўғри келмаганини билдирган бўлса, 10,1 фоизи ўз ҳисобидан 500 минг сўмга яқин, 3 фоиздан ортиғи 1 миллион сўмдан кўп маблағлар ишлатишига тўғри келганини билдирган.
Айниқса, бу кўрсаткичлар Тошкент вилояти (48 фоиз) ва Тошкент шаҳрида (45 фоиз) юқори даражада. Бу борада алоҳида суҳбатларда маълум қилинишича, бу каби харажатларни қоплаш учун ўқитувчиларга синф хоналарини ўз ҳисобидан жиҳозлаш ва безатиш, биринчи синфларда ўйинчоқ ўйнаш учун бурчаклар ташкил этиш, синф хонасининг пол қисмидаги линолеумларни алмаштириш учун ўз ҳисобидан 3 миллион сўмдан ортиқ маблағ ишлатишга тўғри келган.
Шу билан биргаликда, аноним сўровномада ўқитувчилар ўртасида дарс соатлари қанчалик адолатли тақсимланиши масаласи ҳам ўрганилган.
Натижаларга кўра, респондентларнинг 84,4 фоизи уларга мактаб маъмурияти томонидан дарслар адолатли тақсимланишини билдирган. Бироқ 15,6 фоиз респондентлар дарс соатлари тақсимоти адолатли бўлмаслигини маълум қилган. Бу бўйича эътироз, айниқса, Тошкент (42 фоиз), Навоий (33 фоиз), Жиззах (22 фоиз), Самарқанд (19 фоиз) вилоятлари ва Тошкент шаҳрида (31 фоиз) юқори даражада экани маълум бўлди.
Шунингдек, сўровда респондентларнинг 78 фоизи фаолиятида ўзларига юклатилган расмий мажбуриятидан ташқари вазифалар юклатилмаслигини билдирган. Лекин иштирокчиларнинг 15 фоизи “Ташаббусли бюджет” лойиҳаларига овоз йиғиш вазифаси раҳбарият томонидан юклатилишини, 7 фоизга яқини маҳаллий ҳокимиятлар томонидан ташкил этиладиган турли тадбирларга жалб қилинишини маълум қилган.
“Ташаббусли бюджетлаштириш амалиётини янада такомиллаштириш ҳамда фаол маҳаллаларни қўллаб-қувватлаш чора-тадбирлари тўғрисида”ги қарорнинг 6-бандига биноан, ташаббусли бюджетлаштириш жараёнлари доирасида бюджет ташкилотларининг раҳбар ходимлари томонидан мажбурий овоз йиғиш бўйича ходимларга топшириқ беришлари тақиқланади. Бунда мажбурий овоз йиғишга мажбурлаш тегишли ташкилот ходимларини мажбурий меҳнатга жалб қилиш сифатида таснифланади.
Изоҳ (0)