Макроиқтисодий ва ҳудудий тадқиқотлар институти экспертлари Ўзбекистондаги умумтаълим мактабларида давомат билан боғлиқ ҳолатни ўрганди.
Қайд этилишича, сўнгги йилларда Ўзбекистонда мактаб ўқувчилари орасида давоматнинг пасайиб кетиши кузатилмоқда. 2024 йилнинг февраль ойидан эътиборан Миллий гвардия ҳамда Мактабгача ва мактаб таълими вазирлиги томонидан мактабларда давомат муаммоси билан шуғулланувчи махсус ишчи гуруҳ тузилди.
Давомат.э-мактаб маълумотларига кўра, 2022 йилда (жами ўқувчиларнинг 99 фоизи қамраб олинган) мактаблардаги ўртача давомат 83,6 фоизни ташкил этган бўлса, 2023 йилга (98,8 фоизи қамраб олинган) келиб 82,5 фоизга тушган.
Давоматнинг энг паст кўрсаткичлари юқори синф ўқувчилари орасида (10–11-синфлар) кузатилган бўлиб, 78,4 фоизни ташкил этган. Бунинг асосий сабабларидан бири уларнинг олий ўқув юртига тайёрланиш жараёнида қўшимча дарсларга қатнаши бўлиши мумкин. Ўтказилган сўров натижаларига кўра, 16-17 ёшли фарзанди бўлган ота-оналарнинг 87 фоизи фарзанди қўшимча дарсларга қатнашини билдирган.
Ҳудудлар бўйича давоматнинг энг паст кўрсаткичлари Тошкент шаҳри (57,8 фоиз), Жиззах (76,9 фоиз), Тошкент (75,8 фоиз) ва Фарғона (79,8 фоиз) вилоятларида кузатилмоқда. Энг юқори кўрсаткичлар эса Бухоро (89,1 фоиз), Сурхондарё (88,3 фоиз) ва Қашқадарё (88,2 фоиз) вилоятларида кузатилган.л
Фанлар кесимида, бошланғич синф ўқувчилари орасида энг паст давомат кўрсаткичлари ўзбек тили ва математика дарсларида кузатилган. Ўрта синф ўқувчилари орасида ўзбек тили, информатика, адабиёт ва инглиз тили фанлари, юқори синф ўқувчилари орасида ҳам ўзбек тили, информатика, алгебра ва инглиз тили фанларида давоматнинг энг паст кўрсаткичлари кузатилган.
Ота-оналар орасида ўтказилган сўров натижаларига кўра, бетоб бўлиб қолиши (75,4 фоиз), ота-онасига ишларда ёрдам бериши (8,9 фоиз), ота-онаси ишга чиқиши кераклиги, 6 ёшгача бўлган болаларга қарайдиган бошқа одам йўқлиги (3,1 фоиз), хусусий ўқитувчи/репетитор билан ўқиши (1,7 фоиз), мактабга бориши учун қўшимча харажатларга маблағ етишмаслиги (1,1 фоиз) ўқувчиларнинг дарс қолдиришидаги асосий сабаблардир. Сўровда қатнашган ота-оналарнинг 8,5 фоизи фарзанди нима сабабдан дарс қолдирганини билмаслигини айтган.
Маълумот учун, ота-оналар орасидаги сўров Жаҳон банкининг Ўзбекистон миллий инновацион тизимини модернизация қилиш лойиҳаси доирасидаги “Ўзбекистонда Болалар фаровонлиги индексини ишлаб чиқиш” сўровномаси асосида ўтказилган У республиканинг 14 та ҳудудида ўтказилган бўлиб, икки минг нафар ота-онани қамраб олган.
Изоҳ (0)