Ўзбекистонда фаолият юритувчи Humans компаниясининг Сингапурдаги таъсисчиси — Humans Mobile Ltd Марказий банк ва “Ўзбектелеком” хатти-ҳаракатлари ортидан халқаро арбитражга шикоят киритгани ҳақида хабар берилганди. Марказий банк ҳолат юзасидан муносабат билдирди.
Унда айтилишича, Humans Mobile PТЕ LTD компанияси томонидан Ўзбекистон давлат органлари ва идоралари, шу жумладан, Марказий банкнинг ҳаракати билан 2003 йил 15 июлдаги “Сингапур Республикаси ҳукумати ва Ўзбекистон Республикаси ҳукумати ўртасида инвестицияларни рағбатлантириш ва ҳимоя қилиш тўғрисида”ги битимнинг айрим талаблари бузилгани билдирилиб, 2025 йил 20 майда халқаро марказга Ўзбекистонга нисбатан арбитраж жараёнларини бошлаш учун ариза киритилган.
Даъвогарнинг аризаси халқаро арбитраж маркази томонидан иш юритувига қабул қилиниб ҳозирда арбитраж низосини мазмунан кўриб чиқишга тайёрлаш босқичида экани билдирилган ҳолда, иш жараёнларидан келиб чиқиб қўшимча тафсилотлар бериб борилиши маълум қилинди.
Маълумот учун, “Мароқанд” АЖ тўлов ташкилотида фуқароларнинг пуллари қонунчиликда савдоси ва хизмат кўрсатилиши тақиқланган хизматларга (қимор ўйинлар) ўтказилганлиги сабабли, ушбу тўлов ташкилотининг айрим тўлов хизматларини амалга ошириши 2024 йил 25-сентябрьдан бошлаб олти ой муддатга чекланган ҳамда тўлов ташкилоти фаолиятида аниқланган ҳолатларга ҳуқуқий баҳо бериш учун тегишли ҳужжатлар ҳуқуқни муҳофаза қилувчи органларга тақдим этилган эди.
Ўзи гап нимада?
Ўзбекистон ва Сингапур ҳукуматлари ўртасида 2003 йил 15 июлда имзоланган ва 2003 йил 23 ноябрдан кучга кирган Инвестицияларни рағбатлантириш ва ҳимоя қилиш тўғрисидаги икки томонлама битим қоидаларининг бузилиши даъво аризаси беришга асос бўлмоқда.
Арбитраж муҳокамасига Ўзбекистон Марказий банки ва “Ўзбектелеком” компаниясининг хатти-ҳаракатлари сабаб бўлган. Spotʼнинг ёзишича, шу сабаб, Humans Mobile бу хатти-ҳаракатлар билан унга етказилган зарарни қоплашни талаб қилмоқда.
2024 йил сентябрида Марказий банк Humans компаниясига тегишли UPay брендига эга Мароқанд тўлов ташкилоти фаолиятини олти ойга чеклаб қўйди, бу эса унинг банк ҳисобварағидан фойдаланган ҳолда тўловларни қабул қилиш ва ўтказиш хизматлари чекланди. Октябрь ойи охирида Марказий банкнинг ўша вақтдаги раиси Мамаризо Нурмуратов фуқароларнинг пуллари букмекерлик компанияларига ноқонуний ўтказилгани сабабли Мароқанд лицензияси вақтинча тўхтатилганини айтганди.
2025 йил 26 март куни Марказий банкнинг Банк назорати қўмитаси Мароқанд тўлов ташкилотининг айрим операцияларини чеклаш тўғрисида илгари қабул қилинган қарорни бекор қилди. Май ойида Humans Рақобатни ривожлантириш ва истеъмолчилар ҳуқуқларини ҳимоя қилиш қўмитасидан “Ўзбектелеком”га нисбатан монополияга қарши иш очишни сўради. Компаниянинг қайд этишича, давлат оператори қарздорлик туфайли Humans учун интернет тезлигини пасайтириб, хизматларга “монопол юқори нарх” белгилаган ва камситувчи шароитлар яратган.
Humans Group бош директори ва асосчиси Владимир Добринин арбитраж муҳокамаси “инвесторлар ўз манфаатларини инсофсиз маъмуриятчиликдан ҳимоя қилишнинг маданиятли воситаси”, дея қайд этди. Humans суд муҳокамаси “адолатли тартибга солиш тамойилларини мустаҳкамлаш ва тадбиркорликни қўллаб-қувватлашга” хизмат қилади деб ҳисоблаб, зарарни қоплашни талаб қилмоқда.
Изоҳ (0)