Қашқадарё вилоятининг Қарши туманида 37 гектар майдондаги тайёр ғалла ўрилмай, увол қилинмоқда. Фермерлар чақируви билан ҳудудга борган комбайнлар туман ҳокими топшириғига кўра, ортга қайтарилаётгани, фермерларга эса яроқсиз, ғаллани увол қилувчи комбайнлар юборилаётгани хабар қилинганди.
“Дарё” мазкур ҳолатга тўхталиб, туман ҳокими қаҳрига учрагани айтилаётган иккита — “ШДС замин равнақи” ва “Паризода Рўзиқулова” фермер хўжалигига қарашли 37 гектар майдондаги ғалла ўриб олинмагани, бу ғаллани ўришга киришган комбайнларга ҳоким тақиқи қўйилганини очиқлаганди. Мазкур ҳолат бўйича муносабат берган ҳокимлик фермерлар иддаосини рад этиб, ҳудудда ҳақиқатдан ҳам шу икки фермерга қарашли ғалла ўрилмай қолганини тан олганди.
“Бу масалада ҳеч қандай муаммо йўқ. Фермерларга бундай тақиқ қўйилмаган. Чароғил ҳудудидаги мавжуд 54 та фермернинг ғалла майдони навбати билан ўрилмоқда. Шу кеча кундузгача 50 та фермер ғалласи ўрилган бўлса, кеча кечаси қолган тўртта фермерлардан бирининг ғалласи ўрилган. Айни пайтда эса (12 июнь куни, соат 15:30 лар атрофи — таҳр.) ўша тўртта фермер хўжалигидан яна бирининг даласи ўрилмоқда. Сизга шикоят қилган иккита фермер хўжалигининг ғалласи эса бугун кечки пайт ўриб олинади, — деганди ҳокимлик ахборот хизмати раҳбари Тўлқин Турдиев.
Фермерларнинг бугун яна таҳририятга такрорий мурожаат қилишига қараганда ҳокимлик ваъдасининг устидан чиқмаган.
Кеча бу ҳолат бўйича Сиз суриштира бошлаганингиздан сўнг, кечки пайт даламизга ғаллани ўрса, увол қилиб ўрадиган эски комбайнлардан иккитасини олиб келишди. Шахсан мен атрофимдаги фермерлар ғалласини ўрган, ғаллани ўраётганда увол қилмайдиган, яхши комбайн сўрадим. Шу сабаб эски комбайнлар хизматидан фойдаланишни рад этдим. Буни кеча ўша пайтнинг ўзида Сиз орқали жамоатчиликка ҳам маълум қилгандик. Ҳокимлик бугун комбайнлар юборилганди, фермер ерини ўрдиришни истамади дея бизни айблашга ўтибди. Мен ҳам тайёр ғаллам увол бўлмай ўрилишидан манфаатдорман-ку, нега тайёр комбайн ғалламни увол қилмай, тоза ўрса, уни рад этайин? Мантиқ қани бу ерда?, — дейди ғалласи увол бўлаётган фермер Бекзод Фармонов.
Фермернинг айтишича, айни пайтда ҳам ғалласи ўрилмай, шу ҳолатда турибди.
2023 йил давлатимизнинг ғалла хирмонига ҳисса қўшиш учун 20 гектар ерга ғалла экканман. ‘Қарши агро дон’ билан шартнома қилинган бўлишига қарамасдан ҳеч қандай уруғ ва дори берилмаса-да, ғаллани ўз вақтида экдим, суғордим ва дориладим. Мақсад яхши ҳосил олиш эди. Айбим, пахта етиштиришда тумандаги кластер билан эмас, вилоят миқёсида фаолият юритувчи кластер билан шартнома қилиб қўйганим бўляпти. Бу ҳокимга ёқмагани учун тазйиққа учраб келяпмиз, — дейди ғалласи увол бўлаётган фермер.
Бекзод Фармоновнинг айтишича, Қарши туманида уларнинг ғалласидан бошқа ўрилмаган ғалла майдони қолмаган.
Нафақат Чароғил ҳудудида, Қарши туманида ўрилмаган ғалла қолмади. Лекин мен ва ёнимдаги фермер хўжалиги бошқа пахтачилик кластери билан ҳамкорлик қилганимиз учун ҳокимнинг қора рўйхатига тушганмиз. Ва ғалламиз ўрилмай, увол қилинмоқда. Айни пайтда ғалламизни ўт босиб кетди. Дони тўкилиб кетмоқда. Туман ҳокими бизнинг еримизга келган комбайнларни ҳайдаб юборди. Буни олиб чиқишдан мақсад ғалламизнинг увол бўлишидан қийналяпмиз. Шу сабаб ҳукуматимиз раҳбарларидан, тегишли ташкилот раҳбарларидан ёрдам сўраймиз, — дейди фермер Бекзод Фармонов.
Қарши тумани ҳокимлиги фермерлар муаммосига эътибор қаратар экан, “Дарё”да эълон қилинган мақоладаги ҳолат ҳақиқатга тўғри келмаслигини билдирган.
Аслида 3-отряд раҳбари бошчилигида 11 июнь куни соат 20:10 ларда ‘ШДС замин равнақи’ фермер хўжалиги дала майдонига икки дона юқори унумли ‘CLAСС-260’ ва бир дона ‘CASE-4088’ комбайнлари ўримга тушган. Ўрим жараёнида фермер хўжалиги раҳбари ғалла майдонларига нам тушганлигини рўкач қилиб, соат 23:22 да ўримни тўхтатган ва дала майдонларидан комбайнларни бирма-бир назоратдан ўтказиб, ғалла майдонидан чиқариб юборган. Шундан сўнг, 3-отряд соат 00:00 да ‘Заринабегим Сафарова’ фермер хўжалиги дала майдонларида иш бошлаган. Комбайнлар 03:50 гача дала майдонларини ўриб, якунлаган ҳамда навбати билан бошқа фермер хўжалиги даласида иш бошлаган. ‘Паризода Рўзиқулова‘ фермер хўжалиги дала майдонларига 12 июнь куни 16:45 ларда 1-отряд раҳбари бошчилигида юқори унумли 3 дона CASE комбайнлари ўримга тушириш учун борилганда, фермер хўжалиги томонидан розилик берилмади, — дейилади ҳокимлик муносабатида.
Ҳокимлик расмий муносабатида шунингдек, ғалла мавсуми уюшқоқлик билан давом этаётган туманда бу каби ҳолат муносиб эмаслиги, ҳозирда фермер хўжаликлари билан келиб чиққан ҳолат муҳокама қилиниб, назоратга олинганини билдирган.
Бу ҳолат шундайлигича қолиб кетган. Ҳеч ким бизнинг ғалламиз тақдири билан қизиқмаяпти. Энди хусусий комбайн эгаларига илтимос қилиб, пулини бериб, ғалламизни ўрдириб олишимиз керак. Бошқа имконимиз йўқ, — дейди фермерлар.
“Дарё” воқеалар ривожини кузатишда давом этади.
Изоҳ (1)
Кашкадаре, бу бошка даре