“Светофорни қулатган пайтларимиз ҳам бўлди”. Механизаторликни эгаллаган фаррош аёллар ҳикояси (видео)

Наманганда 5 нафар аёлдан иборат механизаторлар жамоаси мавсум давомида 100 тоннадан ортиқ пахта теришга улгурди. Уларнинг барчаси бу касбни эгаллагунга қадар корхонанинг хўжалик бўлимида ишлаётган фаррошлар эди, дея ҳикоя қилади аёллар билан ҳамсуҳбат бўлган «Дарё” мухбири Азизбек Абдувалиев.

 “Устозлардан дакки эшитиб, охири уддалаб кетдик”

Учқўрғон туманида “Узтекс” корхонаси хўжалик бўлимида фаррош бўлиб ишлардик. Корхона раҳбарияти бизни чақириб, механизаторликка ўқишни тавсия қилди. Тўғриси, бу биз учун кутилмаган таклиф бўлди. Олдин ўзимиз муҳокама қилдик, кейин оила аъзоларимиз билан маслаҳатлашдик. Танлов асосида шу касбга уқуви борлар саралаб олинди.

Уч ой давомида ҳам ўқидик, ҳам амалиёт бўлди. Трактор, комбайн бошқардик. Қийинчиликларни айтманг: тормоз ўрнига газни босиб юборган, бетон ариққа қараб кетиб қолган, ҳатто светофорни уриб юборган пайтларимиз бўлди. Бунинг учун яхшигина дакки ҳам эшитдик.

Устозларимизнинг қўллаб-қувватлаши, уйдагиларнинг далдаси билан 15 сентябрдан далага чиқдик. Комбайн замонавий, бошқариш учун жуда қулай. Кабинасида барча шароитлар, ҳатто кондиционер ҳам бор, ишлаб чарчамайсиз.

Турсуной Охунованинг издошлари

Мавсум давомида ҳар биримиз машиналаримизда ўртача 25 тоннадан пахта тердик. Рағбат ҳам шунга яраша бўлди: олдинлари, фаррош сифатида ишлаб юрганимизда 2 миллион сўмдан маош олган бўлсак, механизаторликда бу кўрсаткич 5 миллион сўмга чиқди. Вилоят ҳокимининг ўзи далага келиб, фаолиятимиздан хурсанд бўлиб, ҳар биримизга телевизор совға қилди.

Телевидениедан келиб, биз ҳақимизда кўрсатув ва лавҳалар қилиб кетишганидан сўнг машҳур бўлганимизни кўрсангиз. Ишдан қайтаётсак, “ана, Турсуной Охунованинг издошлари келишяпти” дейишади. Бозор-ўчарга чиқсак ҳам танийдиган бўлишди. Олдимизга қанча аёллар келиб, “биз ҳам ўқисак, ўргансак бўладими?” деб маслаҳат сўраб кетишди.

Шу баҳона автомобиль минишни ҳам ўрганиб олдик. Энди ўзимиз бемалол машина олишимиз ҳам мумкин.

“Трактор ва комбайн бошқаришни ҳозирдан соғиняпмиз”

Бригадада 5 нафар аёл бўлсак, шундан уч нафарининг отаси тракторчи бўлган. Биз бу касбнинг машаққатларини кўриб катта бўлганмиз десак ҳам бўлади. Масалан, Гулнора Акрамованинг отаси 20 йил трактор минган, икки акаси ҳам тракторчи. Одина Жўраеванинг отаси эса 40 йил давомида трактор бошқарган, ўзи эса оиладаги 7 нафар қизнинг кенжаси.

Буойша Исроилова ҳам отасининг тракторида боғча-мактабга қатнаб катта бўлган. Уларнинг оилалари механизаторликни эгаллаб, ота касбини давом эттираётган яқинларидан қанчалик фахрланишини тасаввур ҳам қилолмайсиз.

Пахта йиғим-терим мавсуми ҳам якунланди ва биз яна эски иш жойимизга қайтдик. Ишонинг, трактор ва комбайнларимизни ҳозирдан соғинишни бошладик. Келгусида сафимиз янада кенгаяди, механизаторлик эса доимий касбимизга айланади, деган умиддамиз.