Иқтисодиёт ва молия вазирлиги моддий ёрдам ва нафақа бериш тартиблари ҳақида маълумот берди.
Вазирлар Маҳкамасининг 2021 йил 21-октябрдаги 654-сон қарори билан тасдиқланган Кам таъминланган оилаларни “Ижтимоий ҳимоя ягона реестри” ахборот тизими орқали аниқлаш, уларга кам таъминланган оилалар болалари учун нафақа ва моддий ёрдам тайинлаш ва тўлаш тартиби тўғрисидаги низомга мувофиқ, кам таъминланган оилалар “Ижтимоий ҳимоя ягона реестри” ахборот тизими орқали аниқланади ҳамда уларга кам таъминланган оилалар болалари учун нафақа ва кам таъминланган оилаларга моддий ёрдам тайинланади ва тўланади.
Ушбу тартибга мувофиқ оиланинг ҳар бир аъзосига жами бир ойлик ўртача даромад минимал истеъмол харажатлари миқдоридан ошмаганда оила кам таъминланган деб эътироф этилади ва тегишли ижтимоий нафақа тайинланади.
Болалар нафақасининг бир ойлик миқдори:
- 250 минг сўм — 3 ёшдан 18 ёшгача бўлган битта фарзанди учун, 325 минг сўм — ёши 3 ёшгача бўлган битта кичик фарзанди учун;
- 150 минг сўм — оиланинг иккинчи фарзанди учун қўшимча;
- 100 минг сўмдан — оиланинг учинчи ва ундан кейинги ҳар бир фарзанди учун;
- Кам таъминланган оилалар учун моддий ёрдамнинг ойлик миқдори — 380 минг сўм.
Қуйидаги ҳолларда оила кам таъминланган деб эътироф этилмайди ва ижтимоий нафақа тайинланмайди:
- ариза берувчи ва унинг оила аъзолари эгалигида жами биттадан ортиқ кўчмас мулки ёки бир ва ундан ортиқ нотурар жой бинолари мавжуд бўлганда;
- ариза берувчи ёки унинг оила аъзоларида қуйидагилар мавжуд бўлганда:
- ишлаб чиқарилган муддати 7 йилдан ошмаган, техник ҳолати соз бўлган енгил автотранспорт воситаси;
- ишлаб чиқарилган муддати 15 йилдан ошмаган, техник ҳолати соз бўлган юк ташувчи автотранспорт воситаси, автобус, микроавтобус, экскаватор, трактор, комбайн, юк ташувчи автотранспорт воситаларининг тиркамалари ва ярим тиркамалари, автокран ва бошқа қурилиш техникаси;
- жами 2 ва ундан ортиқ, техник ҳолати соз бўлган енгил ва юк ташувчи автотранспорт воситалари, микроавтобус, экскаватор, трактор, комбайн, юк ташувчи автотранспорт воситаларининг тиркамалари ва ярим тиркамалари, автокран ва бошқа қурилиш техникаси;
- ариза берувчи ва унинг оила аъзоларининг тижорат банкларидаги депозит ҳисобварақларида меҳнатга ҳақ тўлаш энг кам миқдорининг 5 баравари (4,9 млн сўм) ва ундан ортиқ миқдорда маблағлари мавжуд бўлганда;
- ариза берувчи ва унинг оила аъзоларида бозор қиймати меҳнатга ҳақ тўлаш энг кам миқдорининг 5 баравари (4,9 млн сўм) ва ундан ортиқ суммани ташкил этувчи қимматли қоғозлар мавжуд бўлганда;
- оилада меҳнат органлари томонидан тайинланган ишсизлик нафақасини олаётган аъзолари мавжуд бўлганда;
- оиланинг охирги 12 ой давомида иш қидираётган аъзоси томонидан меҳнат органларининг мақбул келадиган ишга доир таклифларини мунтазам равишда (икки ва ундан ортиқ маротаба) рад этилган ҳолларда;
- расмий даромад манбаларига эга бўлмаган ва охирги 6 ой мобайнида иш излаб меҳнат органларига мурожаат қилмаган ҳамда меҳнат органларида ҳисобда турмаган, ўзини ўзи банд қилган шахслар рўйхатига киритилмаган ёки ҳақ тўланадиган жамоат ишлари иштирокчиси ҳисобланмаган меҳнатга лаёқатли оила аъзоси мавжуд бўлганда;
- тартибга асосан бошқа мезонлар.
Бир ойлик ўртача жами даромад миқдорини ҳисоблаб чиқишда ҳисобга олинадиган оиланинг жами даромадига оила томонидан олинган қуйидаги даромадлар киритилади:
- меҳнатга ҳақ тўлаш шаклидаги даромадлар;
- мулкий даромадлар;
- олинган алиментлар. Бунда фуқаро томонидан тўланган алиментлар суммаси оиланинг жами даромадидан чиқариб ташланади;
- якка тартибдаги тадбиркорлик фаолияти билан шуғулланувчи ва ўзини ўзи банд қилган фуқароларга ҳисобланадиган норматив даромадлар;
- пул тушумлари, шу жумладан, чет элда ишлайдиган ёки чет элда тадбиркорлик ва бошқа фаолиятни амалга оширувчи оила аъзолари ва бошқалардан олинган пул ўтказмалари суммаси.
Бунда хорижий валютада олинган пул ўтказмалари Марказий банкининг “Ягона реестр” АТ томонидан электрон маълумот олинган кундаги белгиланган курси бўйича Ўзбекистоннинг миллий валютасида ҳисобга олинади.
Изоҳ (0)