Трамп Исроил-Эрон урушига аралашиши мумкинлигига ишора қилди. Бироқ якуний қарор қабул қилмаганини айтди.
АҚШ президенти Дональд Трамп Қўшма Штатлар 6 кун давомида шиддатли бомбардимонлар уюштирилган Исроил-Эрон ўртасида давом этаётган можарога тўғридан тўғри аралашиш ёки аралашмаслиги ҳақида турли маълумотлар беришда давом этмоқда.
Республикачилар етакчиси бўлган Трампга 18 июнь куни Оқ уйда Яқин Шарқдаги ҳолат юзасидан савол берилди. Уларнинг орасида АҚШ Эроннинг ядровий иншоотларига зарба беришда Исроилга қўшиладими, деган савол ҳам бор эди.
“Менинг нима қилишимни билмайсиз. Қўлимдан келади. Мен бундай қилишим ҳам, қилмаслигим ҳам мумкин. Нима қилмоқчилигимни ҳеч ким билмайди. Мен сизга шуни айтишим мумкин: Эронда кўп муаммолар бор ва улар музокаралар олиб боришни хоҳламоқда”, деди Трамп журналистлардан бирига.
Кейинроқ “Ювентус” футбол клуби билан овал кабинетда суратга тушаётиб, Трамп яна бир бор ўз қарорини қабул қилмаганига ишора қилган.
“Нима қилиш кераклиги ҳақида ғоялар бор, лекин мен якуний қарорга келмадим. Мен узил-кесил қарорни муддатидан бир сония олдин қабул қилишни яхши кўраман. Чунки ҳамма нарса ўзгаради, айниқса, урушда. Вазият урушда кескин ўзгариши мумкин”, дея қўшимча қилган Трамп.
Баъзи республикачилар ва демократлар Трампнинг Эрон ва Исроил ўртасидаги жанговар ҳаракатларда иштирок этишини чекловчи қонунчиликни жорий этган. Шу билан бирга, консерватив шарҳловчи Такер Карлсон ўнг қанот сенатори Тед Круз билан биргаликда видеомурожаат қилган. Унда Трампнинг икки тарафдори АҚШ Эрондаги режимни ўзгартиришга интилиши керакми ёки йўқлиги ҳақида баҳслашган.
Бунга жавобан Трамп шундай деди: “Мен ҳам жанг қилишни истамайман. Аммо агар жанг қилиш ва уларнинг ядро қуролига эга бўлиши ўртасида вазият бўлса, қилиш керак бўлган ишни қилиш керак. Балки уришишга тўғри келмас. Шуни унутмангки, биз уришаётганимиз йўқ”.
Трамп бир неча бор таъкидлаганидек, агар Эрон АҚШнинг ядровий дастурини чеклаш шартларига рози бўлганида, ҳозирги можаро ҳеч қачон содир бўлмасди. АҚШ расмийлари апрель ойидан бери эронликлар билан учрашиб, ядровий қурол яратиш учун зарур бўлган Эроннинг уранни бойитишини чеклаш ҳақида музокаралар олиб бораётган эди.
Аммо Эрон узоқ вақтдан бери ядровий арсенал қуриш амбицияларини рад этиб келади. Бунинг ўрнига уранни фақат фуқаролик энергетикаси мақсадларида ишлатишини таъкидлаган.
Изоҳ (0)