“Муҳташам юз йил” сериали дунёга кўплаб истеъдодли турк актёр ва актрисаларини танитди, Ниҳан Буюкаач ҳам улардан бири бўлди. Айнан у экранларда Гулшоҳ хотун образини — Моҳидавроннинг содиқ хизматкорини гавдалантирди. Гулшоҳ хотун кейинчалик Хуррам тарафига ўтган бўлса-да, ҳарам фитналари туфайли ҳалок бўлади.
Ниҳан Буюкаач 1981 йил 28 сентябрда Истанбулда туғилган. Унинг оиласи камбағал бўлиб, онаси оғир хаста эди. Болалигида Ниҳан жуда камгап ва одамови қиз бўлган. У нотаниш одамлар билан мулоқот қилишга қийналарди. Унинг ягона қувончи театр эди — Буюкаач спектаклларни томоша қилишни жуда яхши кўрар ва ўзини бош қаҳрамонлар ўрнида тасаввур қиларди. У дастлаб актёрлик карьераси ҳақида ўйламаганди, чунки ўзига ортиқча эътибор қаратилишидан ва камералардан қўрқарди, аммо бу унинг театр ҳақида орзу қилишига халақит бермаган.
Бироқ юқори синфга келганда, Ниҳан агар ҳаётини санъат билан боғламоқчи бўлса, қўрқувларини енгиши кераклигини тушунди. Оиласининг оғир моддий аҳволига қарамай, у Анқара университетининг театр бўлимига ўқишга кирди — у ерда бир вақтнинг ўзида тарих ва географияни ҳам ўрганди. Ўқиш пайтида Ниҳан ётоққа михланиб қолган онасига ғамхўрлик қилди, бироқ битирув имтиҳонлари арафасида онаси вафот этди, кўп ўтмай отаси ҳам оламдан ўтди. Барча қийинчиликларга қарамай, бўлажак актриса битирув имтиҳонларини аъло баҳоларга топширди ва орзу қилган дипломини қўлга киритди.
Ижодий фаолияти
Ниҳан Буюкаач ўқишни тугатиши биланоқ давлат театрида ишлай бошлади, бўш вақтларида эса маҳаллий рок гуруҳларидан бирида куйларди. Ёш санъаткор саҳнада ўзини яхши ҳис қилар, унинг ижроси томошабинлар томонидан доимо юқори баҳоланарди. Камерадан қўрқиш ўтмишда қолганини англаган Ниҳан кинематографияда ҳам ўз кучини синаб кўришга қарор қилди. 2005 йилда у “Бешинчи ўлчам” фильмида кичик рол ижро этди, кейинги йили эса “Бўрон” сериалида Тамара ролини ўйнади. Бу рол уни кино актрисаси сифатида танитди.
Кейинги беш йил давомида турк сериали юлдузи театр ва кинодаги фаолиятини муваффақиятли тарзда бирлаштирди. У “Мактаб синфи”, “Юрагингдан сўра”, “Бўлиниш: Фаластин урушда” каби фильмларда суратга тушди. 2011 йил актриса учун омадли йил бўлди — у “Муҳташам юз йил” сериалида Гулшоҳ хотун ролини қўлга киритди.
Актрисанинг кейинги карьераси муваффақиятли ривожланди. У ҳар йили кинода суратга тушиш учун бир нечта таклифлар оларди. Жумладан, Ниҳан “Юрак ишлари”, “Мафия дунёни бошқара олмайди” “Жасур ва гўзал”, “Тун маликаси”, “Махфий”, “Менежеримга қўнғироқ қилинг”, “Оролдаги эртак”, “Оила учун”, “Сени узоқ кутдим”, “Севги исми” ва бошқа сериалларда рол ижро этган.
Ҳозирги кунда турк актрисасининг фильмографияси 20 дан ортиқ ролларни ўз ичига олади. Ниҳан театрдаги фаолиятини ҳам муваффақиятли давом эттирмоқда. Интервьюларидан бирида Буюкаач айнан театрда ўзини уйдагидек қулай ҳис қилишини эътироф этган.
Ниҳан Буюкаач “Муҳташам юз йил” сериалида
Ниҳан Буюкаач сериалда Гулшоҳ ролини ажойиб тарзда ижро этди. Томошабинлар унинг қаҳрамонидан нафратланишса-да, актрисанинг маҳоратига тан беришди.
Гулшоҳ “Муҳташам юз йил”нинг биринчи қисмидаёқ пайдо бўлади. У шунчаки Моҳидавроннинг хизматкори эмас, балки унинг ишончли ва сирдош кишисидир. Шахсий ҳаёти бўлмаган Гулшоҳ ўз бекасининг тақдирига бутунлай берилиб кетади. У бекасининг дардига шерик бўлиб, уни бор кучи билан ҳимоя қилишга интиларди, бироқ кўпинча унинг хатти-ҳаракатлари жирканч туюларди. Аммо вафо ва садоқат қийин вазиятда хотунга ёрдам бермади. Фотиманинг пайдо бўлиши Моҳидаврон ва Гулшоҳ ўртасидаги катта жанжалнинг асосий сабабчисига айланади. Аёл Иброҳим пошонинг сири туфайли ҳаёти қил устида турганини англагач, Хуррамга бўйсунишга қарор қилади ва унга содиқ қолишга онт ичади. Бироқ Хуррам собиқ душманига ишонмасди.
Хуррам бир муддат Гулшоҳдан ўз манфаатлари йўлида фойдаланиб, айнан у орқали Нигор ва Иброҳимнинг севги муносабатлари ҳақида хабар топади. Аёл чиндан ҳам Хуррамга садоқат билан хизмат қилишга интилади, бироқ бу уни ҳалокатдан сақлаб қололмайди. Гулшоҳнинг ҳаёти фожиали тарзда якунланади — у Хатичани ўлдирмоқчи бўлган пайтда Нигорнинг қўлида ҳалок бўлади.
Гулшоҳ роли Ниҳонни бутун дунёга машҳур қилди. Аммо “Муҳташам юз йил” сериалининг якунидан бир неча йил ўтгач, актриса ўз қаҳрамонини ҳеч қачон ёқтирмаганини тан олди. Буюкаачнинг айтишича, у анча вақтгача актрисани қаҳрамонидан ажрата олмаган мухлислар нафратига дуч келган.
Шахсий ҳаёти
Ниҳан Буюкаач шахсий ҳаётини ошкор қилишни хоҳламайди. Актриса узоқ вақт давомида болаликдаги руҳий жароҳатларини даволаб, бугунги кун билан яшашга интилган. 2013 йил сентябрь ойида турк сериали юлдузи овоз оператори Мурат Шентурк билан турмуш қурди. Тўрт йилдан сўнг, уларнинг суюкли қизлари дунёга келди ва ота-онаси унга Чағла деб исм қўйишди.
Афсуски, қизалоқ туғилганидан кейин Мурат ва Ниҳан орасида совуқчилик пайдо бўла бошлади. 2022 йилда улар расман ажрашди, бироқ ажралиш сабабини ошкор қилишмади. Васийлик ҳуқуқи Буюкаачда қолди. Актрисанинг ўзи ажрашгани ҳақида ҳеч қачон изоҳ бермаган, аммо турк матбуоти Ниҳан учун ажрашиш жуда оғир кечганини ва у бир неча ой давомида уйдан деярли чиқмаганини ёзган. Фақатгина қизи ва дўстларининг қўллаб-қувватлаши туфайли у одатий ҳаётига қайта олди.
Ниҳан Буюкаач ҳозирда
Ҳозирда турк актрисаси театр ва кинода фаолиятини давом эттирмоқда. Барча бўш вақтини қизи билан ўтказади. Буюкаач тадбирларга камдан-кам қатнашади, бунинг ўрнига очиқ ҳавода сайр қилишни маъқул кўради. У шахсий ҳаётини қаттиқ ҳимоя қилади ва журналистлар билан деярли мулоқот қилмайди.
Ижтимоий тармоқларда Ниҳанни бутун умри давомида курашиб келаётган ортиқча вазни учун кўпинча танқид қилишади. Актриса соғлом овқатланишга интилади ва мунтазам равишда пилатес билан шуғулланади, хейтерларнинг ғазабли изоҳларига эса эътибор бермасликка ҳаракат қилади. У эртами-кечми барибир яхшилик ғалаба қозонишига ишонади ва ҳаётда энг муҳими — ўз муваффақиятига ишонч ҳамда танланган касбга содиқлик эканини таъкидлайди.
Изоҳ (0)