Апрель ойида (29 май ҳолатига) истеъмолчиларга 112,2 млн чек учун 105,6 млрд сўмдан ортиқ кешбек тўланган. Бу ҳақда Солиқ қўмитаси матбуот хизмати хабар берди.
Тўланган кешбекларнинг энг катта қисми Тошкент шаҳрига тўғри келади – 42,2 млрд сўм. Кейинги ўринда эса Тошкент вилояти – 11 млрд сўм.
Шу билан бирга, Самарқанд вилоятида 7,9 млрд сўм тўланган бўлса, Фарғона вилоятида 7,2 млрд сўм тўлаб берилган.
Шунингдек, Андижон вилоятида 5,1 млрд сўм тўланган.
Март ойида 103,2 миллиард сўмдан ортиқ кешбек тўланганди. Ўшанда тўланган кешбекларнинг энг катта қисми Тошкент шаҳри (45 миллиард сўм) ҳиссасига тўғри келган.
Қўмита ҳисоботида қайд этилишича, 2024 йилда истеъмолчиларга 1 миллиард дона чек учун 1 триллион 52 миллион сўмдан ортиқ кешбек тўланган. Мазкур даврда тўланган кешбекларнинг энг катта қисмини Тошкент шаҳри аҳолиси олган — 412,2 миллиард сўм. Кейинги ўринларда Тошкент (107,1 миллиард сўм), Самарқанд (93,2 миллиард сўм), Фарғона (75,6 миллиард сўм) ва Андижон (52 миллиард сўм) вилоятлари қайд этилган.
Эслатиб ўтамиз, Ўзбекистонда кешбек тизими президент қарори билан 2022 йил 1 январдан жорий этилган. Қарорда чакана савдо, умумий овқатланиш ва аҳолига маиший хизмат кўрсатиш объектларидаги савдолар учун берилган чеклар Солиқ мобил иловасида сканерланса, харид суммасининг 1 фоизи фуқарога қайтарилиши белгиланган.
Изоҳ (0)