Тожикистонда 13 апрель куни юз берган зилзилалар оқибатида уч ёшли бола ҳалок бўлди. Қўшни республикада учта ер силкинишлари қайд этилди. Бу ҳақда мамлакат Фавқулодда вазиятлар ва мудофаа қўмитасига таяниб, “Спутник Тожикистон” хабар берди.
Хабарга кўра, Рашт туманида уч ёшли болани девор босиб қолган, оқибатда у ҳалок бўлган. Зилзила 13 апрель куни соат 9:24 да содир бўлган. Унинг эпицентри Раштдан 21 километр шимолда, Душанбедан 160 километр шимоли-шарқда кузатилган. Зилзила кучи Рашт туманида 5—6 баллни, Душанбеда эса 3 балл атрофида бўлган.
Шундан сўнг 4 ва 3 магнитудали иккита ер силкинишлари қайд этилган. Табиий офат оқибатида 29 та турар жой биноси ва битта мактабга зарар етган. Шундан 17 та уй ва мактаб Рашт туманида, яна 12 та уй Тожикободда жойлашган. Зилзила содир бўлган ҳудудда зарарни баҳолаш учун Фавқулодда вазиятлар қўмитаси комиссияси ишламоқда.
Тожикистонда содир бўлган зилзила кучи қўшни Ўзбекистон ва Қозоғистон ҳудудларига ҳам сезилган. Жумладан, Фарғона вилоятида 3 балл, Наманган, Сирдарё, Андижон вилоятларида 2—3 балл, Жиззах, Самарқанд, Сурхондарё вилояти ва Тошкент шаҳрида 2 баллни ташкил этган. Қозоғистонда эса ер силкинишлари уч баллни ташкил этган.
Изоҳ (0)