Тошкент халқаро аэропортида қиймати 245 млн сўмлик қимматбаҳо металл ва қимматбаҳо тошлардан ишланган қўл соатлари ва заргарлик буюмларининг ноқонуний олиб кирилишига чек қўйилди. Бу ҳақда “Тошкент-Аэро” ихтисослаштирилган божхона комплекси хабар берди.
Жумладан, Пекиндан қайтган йўловчи қиймати 145 миллион сўмлик, Дубайдан қайтган йўловчи эса 60 миллион сўмлик қимматбаҳо соатни “яшил” йўлак орқали олиб ўтишга уринган вақтида тўхтатиб қолинди. Ҳар иккала ҳолатда ҳам соатлар жисмоний шахслар томонидан товарларни божсиз олиб кириш меъёридан ортиқча бўлган.
“Истанбул–Тошкент” рейси бўйича парвозини якунлаган йўловчи эса рухсат этилган 65 грамм оғирликдаги заргарлик буюмларидан ташқари яна 40 грамм тилла тақинчоқларни олиб киришга уринган вақтида фош қилинди.
Қиймати 50 миллион сўмлик ушбу заргарлик буюмлари шахсий кўрик давомида йўловчининг чўнтагида аниқланган.
Маълумот учун, жисмоний шахсларга шахсий эҳтиёж учун 65 граммгача оғирликдаги заргарлик буюмларини божсиз олиб киришга рухсат этилади. Аммо бу товарларни божсиз олиб киришнинг умумий меъёрлари доирасида бўлиши керак. Масалан, ҳаво йўллари орқали Ўзбекистонга кириб келишда 2 минг долларгача қийматдаги товарларни божсиз олиб киришга рухсат этилади.
Чегарадан ноқонуний тарзда олиб ўтиш ҳолатлари кўпаймоқда
Аввалроқ Сирдарёда 6,7 килодан ортиқ заргарлик буюмларини чегарадан яширинча олиб ўтмоқчи бўлган аёл ва унинг невараси қўлга тушган эди.
Сентябрь ойида эса Тошкент халқаро аэропортида қимматбаҳо соатни ноқонуний олиб ўтишга уриниш, таркибида кучли таъсир қилувчи модда бўлган қаҳвани олиб кириш фош этилганди.
Июлда эса Тошкент халқаро аэропортида фуқаро пневматик тўппонча олиб ўтмоқчи бўлган эди. Божхона назоратига тегишли тартибда тақдим этилмаган, муқобил манбаларга кўра, тахминий қиймати 700 минг сўм бўлган жами 1 дона КР-18 русумли пневматик тўппонча ва Аngry BB’s номли оғирлиги 1 кг бўлган шарсимон шаклдаги пластик ўқлар борлиги аниқланди, дейилади божхона комплекси ахборотида.
Май ойида эса ДХХ 1,4 кг олтинни Ўзбекистондан ноқонуний олиб чиқиб кетаётган шахсларни ушлаганди.
Изоҳ (0)