Президент Шавкат Мирзиёев Наманганга ташрифини “Gavhar Jewel Group” корхонасидан бошлади. Бу нафақат кўпчилик, ҳатто унинг раҳбари Азизбек Абдурасулов учун ҳам кутилмаган ҳолат бўлди. Бу ҳақда тадбиркорнинг ўзи “Дарё” мухбири Азизбек Абдувалиев билан суҳбати давомида ҳикоя қилди.

“Захира вариантдан ташрифнинг биринчи манзилига айландик”

Ташрифдан олдин захира вариант сифатида кўрилаётгандик. “Тайёргарлик кўринглар, киришлари мумкин” дейишди. Очиғи, бунга ўзимизнинг ишчи-ходимлар ҳам охиригача ишонмади. Чунки ташкил топганимизга ҳеч қанча вақт бўлмаган, ҳали кўпчилик билмайди.

Шундай бўлдики, ташрифнинг биринчи манзилига айландик. Президент бўлимларимизни бирма-бир кўриб чиқди, ишчи-ходимларимиз билан гаплашди. “Йилига 100 тонна олтин қазиб оляпмиз. Лекин унинг атиги 6 фоизи қайта ишланяпти. Туркияда эса 30 тонна қазиб олиниб, 300 тонна экспорт қилиняпти. Бу соҳада бир оз кечикдик, бироқ вазиятни ўнглаш учун барча шароитларни яратамиз” деди давлат раҳбари.

Шу ернинг ўзида туркиялик ҳамкорларимиз ва инвесторлар билан мулоқот бўлди. Бунинг яхши томони — уларнинг бизга бўлган ишончи янада ортди. Ишчиларимиз учун эса жуда катта мотивация бўлди.

Ташрифнинг эртасига йиғилишга таклиф этилдим. Йиғилиш танқидий руҳда ўтди, ҳокимлар, вазирларга кўплаб вазифа ва топшириқлар берилди. Президент бу ерда мени турғизиб, “шу йигитга раҳмат, 10 та саволимдан 10 тасига дадил жавоб берди” деб мақтади. Айланма маблағларни кўпайтиришга ёрдам бериш, соҳасини ривожлантиришга қаратилган янги қарорлар тайёрлашга кўрсатма берилди.

Аслида ҳозирнинг ўзида заргарликка жуда катта эътибор қаратилган. Биринчидан, олтинни сотиб олишга имконият берилди. Иккинчидан, шу сотиб олинган тилла учун ҳам маблағни 180 кун кечиктириб тўлашимиз мумкин. Бу вақт мобайнида хом ашёни қайта ишлаб, маҳсулот тайёрлаб, уни сотишга ҳам улгурамиз. Қолаверса, солиқлардан 2026 йилгача озод қилинганмиз.

Яратилган бу имтиёзлар туфайли ҳозирнинг ўзида ишлаб чиқарувчиларимиз ички бозорда хориж компаниялари билан рақобатга киришди, маҳаллий брендлар кўпайди.

Стоматологиядан заргарликка дадил қадам

Ўзим асли стоматологман. Отам Америкада шу соҳада ишлаб юрган пайтлари рақамли стомалогияни Ўзбекистонга олиб киришни бошладик. Бизда заргарликка яқин техник жиҳатлар кўп, масалан металлокерамика. Қолипларни 3D принтерда тайёрлаймиз. Қизиқиш пайдо бўлди заргарлик маҳсулотларини ҳам қолипини қуйиб кўришга. Қарасак, чакки эмас. Чунки заргарлар кўпинча қўлда тайёрлашади, стандартларига эътибор берилмайди, моделлар ҳар хил чиқади, жилови, вазни турлича. Биз стоматологияда аниқ ишлаганимиз учун заргарлик маҳсулоти ҳам ўта юқори сифатда чиқди.

Тўртинчи-бешинчи авлодда заргар ўртоқларим бор, улар билан маслаҳатлашиб, заргарларга қолип етказиб беришни бошладик. Аммо биз қолип етказиб берган заргарларнинг кўпи барибир биз истаган сифатни чиқариб бера олмади. Шундан кейин бу соҳага ўзимиз қадам қўйиб, 2021 йили тўла киришиб кетдик, кейинги йили эса корхонамиз ташкил топди.

Корхонамизни 10 кишидан бошладик. Ҳар бир бўлимни босқичма-босқич ишга туширдик. 2022 йили 30 килограмм маҳсулот чиқардик, асосий вақтимиз маҳаллий заргарларни саноат усулида ишлашга ўргатишга кетди. 2023 йили 270 килограмм маҳсулот чиқаришга эришдик, ишчиларимиз сони эса 100 нафардан ошди.

“Брендимизда Чуст дўпписи акс этган”

Биласиз, чет элда компанияларнинг номлари кўпинча кишиларнинг исм-шарифлари билан аталади. Онамнинг исмлари Гавҳар, биз ҳам шу номда тўхталдик. Логотипимизни кўрган бўлсангиз, Чуст дўпписидаги белги акс этган. Наманганни аввалги гербида ҳам шу белги бор. Шаклини бир оз ўзгартирдик, бироқ моҳият ўша-ўша. Белгимиз аввало миллий брендни ривожлантиришни қаратилган.

Аста-секин ишимиз кўриниб, ютуқларимиз ҳам пайдо бўляпти. Хусусий заргарлик корхоналар ичида биринчи бўлиб ISO сертификатини олдик. Бухорода бўлиб ўтган ҳамда 58 давлатдан 270 дан ортиқ корхона қатнашган заргарлик ва зардўзлик фестивалида “Заргарлик соҳасида энг яхши корхона” номицинацияси ғолиби бўлиб, биринчи ўринни олдик. Дубайдаги халқаро кўргамада эса соҳага қўшган ҳиссамиз учун Глобал Исон мукофотини қўлга киритдик.

Умуман, ҳисоблаб кўрсам, ўтган йилни ўзида 20 дан ортиқ турли кўргазмаларда қатнашибмиз. Бу қатнашувлар бизни танитди, чунки ўзим заргар бўлмаганим учун аввал ҳеч ким бизни билмасди, контактларимиз йўқ эди. Ҳозир эса барча ҳудудлардаги ҳар бир тилла сотиладиган манзилларга маҳсулотларимиз етиб борди.

“Асосий эътиборни экспортга қаратамиз. Маҳсулотларимиз хорижда сотиладиган вақт келди”

Маҳсулотларимизни Қозоғистон, Қирғизистондан келиб опкетишяпти, Тожикистондан улгуржи харидорлар буюртма қилишни бошлади. Россияликлар франшиза сотиб олди, яқин кунларда катта миқдорда кумуш ва тилла буюмлар экспортини бошлаймиз.

Республика бўйлаб йил якунигача 14 та дўкон очишни режалаштирганмиз. Аэропортлардаги дюти-фри дўконларида ҳам маҳсулотларимиз бўлади насиб.

Президентнинг Наманганга келгуси ташрифига қадар маҳсулотларимизнинг экспортдаги улушини 80 фоизга чиқариш ниятим бор. Ҳозир 10 нафар маҳаллий заргар билан ишлаётган бўлсак, бу кўрсаткич яқин орада 100 нафарга етади.