Ҳинд фильмларидаги турли безаклар, заргарлик буюмлари ва қаҳрамонларнинг либослари алоҳида эътирофга лойиқ. Баъзи томошабинлар Болливуд кинолари сюжетининг соддалигидан кулиши мумкин, аммо Болливудда сюжетдан кўра қаҳрамонларнинг ташқи кўриниши ва декорацияга катта эътибор берилади. Бунга қаҳрамонлар кийган қимматбаҳо либослар ва заргарлик буюмлари яққол мисол.
Таниқли режиссёр Санжай Лила Бҳансали фильмларида моҳирона ва дид билан танланган безаклар тўплами ва либослар билан машҳурдир. Яқин орада у ўзининг илк сериалини тақдим этиш арафасида. Сериал “Хираманди: олмослар бозори” деб номланади ва лойиҳа учун режиссёр талабига кўра 300 килограммдан ортиқ қимматбаҳо заргарлик буюмларига буюртма берилган.
Коллекция 10 мингдан ортиқ тақинчоқлардан иборат бўлиб, Маниша Койрала, Сонакши Синҳа, Адити Рао Хидари, Рича Чадҳа, Шармин Сигал ва Санжида Шайҳ каби ҳинд актрисалари учун мўлжалланган.
“Хираманди: олмослар бозори” сериал премьерасини интиқлик билан кутар эканмиз, ҳозирча сўнгги йилларда тақдим этилган энг яхши саҳна декорацияси ва актрисалар либосларига эга машҳур ҳинд фильмларини ёдга оламиз.
“Девдас” (2002)
Ҳинд кинематографиясида алоҳида ўринга эга бўлган “Девдас” фильми ҳанузгача севиб томоша қилинади. Унда либослар бўйича рассом Нита Лулла фаол иш олиб борган. Асарда ҳар бир тақинчоқ актрисалар ҳуснига ҳусн бағишлаган. Актриса Айшвария Райдаги анор тасвирли кундан безаги фильмнинг энг ёрқин заргарлик буюмларидан бўлган.
(Кундан — қимматбаҳо тошлардан ясалган ва томоққа тақиладиган кенг заргарлик буюмлари тури)
“Жодха ва Акбар” (2008)
Мусулмон ҳукмдор ва Ражпут маликасининг муҳаббат тарихи ҳақидаги фильмда дизайнерлар томонидан яратилган Айшвария Райнинг образи таҳсинга лойиқ. Фильмда актриса қиймати салкам 2,5 миллион долларлик ва оғирлиги 200 килограмм бўлган тилла тақинчоқлар билан безанган.
Тилла буюмлар хавфсизлигини таъминлаш мақсадида ишлаб чиқариш жараёнида 50 га яқин қўриқчи ёлланган.
“Бажирао ва Мастани” (2015)
Ушбу ранг-баранг ва ўзига жалб этувчи фильмда декорациянинг барча элементлари бор: Мастани ролини ижро этган актриса Дипика Падуконенинг натҳидан тортиб (натҳ — бурунга тақиладиган ҳинд тақинчоғи) Приянка Чопранинг кунданигача.
Ҳар бир заргарлик буюмлари қадимий нақшлар асосида яратилган бўлиб, 24 каратлик олтиндан ясалган. Ишлаб чиқарувчилар заргарлик буюмларини лойиҳалаш учун бир йил вақт сарфлаган.
Падмавати (2018)
Бош ролни ижро этган актриса Дипика Падуконе фильмда 30 килограмм оғирликка эга лехенги (юбка) ва 30 килограмм тақинчоқ буюмлари билан намоён бўлган.
Бахубали (2015, 2017)
Режиссёр Ражамулининг ушбу фильми 2015 йилда суратга олинган бўлиб, фильмда малика Девасен образини актриса Анушка Шетти гавдалантирган. Ушбу фильмда ҳам бош қаҳрамон бошдан оёқ тилла буюмлар билан безанган.
Изоҳ (0)