Миллиардерлар оиласида туғилган икки ёш — Анант Амбани ва Радҳика Мерчант 12 июль куни Мумбайда турмуш қуришди. Амбанилар оиласи бир неча ой давомида йирик тадбирлар уюштирди ва унга жаҳонга машҳур кўплаб инсонлар ташриф буюрди.
Келинг, тўйнинг диққат маркази бўлган келинчак — Радҳиканинг тўёлди ва кейинги маросимлардаги гўзал либосларини яқиндан томоша қиламиз.
Шубҳ Ааширваде маросимида биринчи образ
Амбани оиласи аъзоси сифатида биринчи чиқиши учун келин образи ҳақиқий санъат асари эди. Узоқ вақт давомида яратилган ушбу гўзаллик ҳиндистонлик дизайнер Рея Капур ҳамда рассом ва ҳайкалтарош Жаясри Бирман билан ҳамкорликда тикилган.
Жаясрининг суратларини либосга жо этиш учун 12 та леҳенга панели махсус италян матосида чизилган. Ундаги гўзал тасвирлар қўл меҳнати маҳсули бўлиб, Зардози брендига мансуб тилла каштадан фойдаланилган.
Радҳика Мерчантнинг тўй кунидаги образи
Эртакнамо услубда ўтган ушбу тўйда Радҳика Абу Жани Сандееп Хосла брендига тегишли ва Радҳика учун махсус буюртма қилинган либосда намоён бўлди. Келинчак анъанага кўра яқин қариндошлари — онаси, холалари ва синглиси ўз тўйларида аввал тақиб юрган оилавий заргарлик буюмлари билан безанди.
Радҳика ҳиндистон анъанасига кўра қизил ва оқ рангдаги келин либосида бўлди, бу гужарот халқига хос одатдир. Либос иккита алоҳида олинадиган фата ва 5 метрлик шлейфдан иборат бўлиб, қимматбаҳо тошлар ва безаклар билан тўлдирилган.
Ҳалди маросими учун образ
Ҳалди маросимида бўлажак келин Радҳика бир эмас, иккита бир-биридан гўзал либосларда пайдо бўлди.
Келиннинг биринчи образи Анамика Кҳанна брендига мансуб сариқ рангли леҳенга кўйлаги бўлди. Унинг бўйнидаги гулли дупатта безаги барчанинг эътиборини тортди. Ушбу образ учун Радҳика енгил ва сокин макияж танлади.
Ҳалди маросимидан кейинги кечада Радҳика Анамика Кҳанна брендининг яна бир кўркам либосида чиқиш қилди.
Бу сафар у мураккаб кашта ҳамда олмос тошлар билан ишлов берилган леҳенгани танлади.
Сангит маросими учун образ
Ушбу образда келинчак бутунлай бошқача қиёфада пайдо бўлди. Хабарларга кўра, бу образ зиёфатнинг якуний қисми учун мўлжалланган.
Радҳика дизайнер Маниш Малҳотра томонидан яратилган кулранг ва занжирсимон сари кийди. Сари замонавий услубда ишланган бўлиб, унинг устки қисми корсетдан иборат. Келиннинг ушбу ёрқин образи олмос тақинчоқлари, чокер маржонлари, қимматбаҳо зирак ва билагузуклар билан якунланган.
Радҳиканинг Сангит маросими учун кундузги кўриниши ҳам ўзгача бетакрор ва ҳинд миллий услубида бўлди.
“Дандия” учун оқшом либоси
4 июль, пайшанба куни Кокилабен Амбани (Анантнинг бувиси) бўлажак жуфтлик учун дабдабали “Дандия” зиёфатини уюштирди. Унда Радҳика ёрқин сиёҳранг ҳиндча миллий либосда намоён бўлди.
Мамеру маросими учун образ
3 июль, чоршанба куни Антиллада бўлиб ўтган Мамеру маросимида келинчакка оила аъзолари томонидан турли совғалар, заргарлик буюмлари тақдим этилди. Кечада Радҳика дизайнер Маниш Малҳотра томонидан тайёрланган леҳенгада тўй маросимидан завқланди.
Изоҳ (0)