Исроилнинг Тель-Авив шаҳрида пичоқ билан қуролланган эркак ўткинчиларга ҳужум қилиши оқибатида 4 киши жароҳатланди. Бу ҳақда Ynet хабар берди.
Хабарга кўра, ҳуқуқ-тартибот идоралари ҳодисани теракт деб баҳолаган. Ҳодиса шаҳарнинг жанубий қисмидаги Нахолат-Бинямин кўчаси ҳудудида содир бўлган. Ҳужум қилган эркак зарарсизлантирилган.
У 18 январь куни Исроилга сайёҳ сифатида келган. Ҳужум АҚШда яшаш гувоҳномасига эга бўлган 29 ёшли марокашлик Қоди Абдел Азиз томонидан содир этилган. У Нахолат-Бинямин кўчасида уч нафар тинч аҳолига ва Грузенберг кўчасида бир кишига ҳужум қилган.
“Террорчи хавфсизлик кучлари томонидан зарарсизлантирилди”, дейди полиция матбуот хизмати.
Тахминларга кўра, ҳужум қилган эркак шаҳар марказига мотоциклда келган. Гувоҳлар унинг жиноят содир бўлган жойдан қочишга уринганини кўрган.
18 январь куни пичоқ билан қуролланган эркак Тель-Авивда ўткинчиларга ҳужум қилганди. У Левантин кўчасида бир кишига пичоқ билан зарба беришга уринган, шундан сўнг уни бошқа бир ўткинчи отиб ташлаган. Оқибатда 20 ёш атрофидаги эркак тан жароҳати олган. Ҳодиса полиция томонидан гумон қилинаётган террорчилик ҳаракати сифатида ўрганилмоқда.
Изоҳ (0)