Россияда девелоперлар кадрлар кескин етишмаслиги шароитида Жануби-шарқий Осиё мамлакатларидан ишчи кучи ёллашни бошлади. Мазкур ишчилар Марказий Осиёдан келадиган мигрантларга нисбатан камроқ маош талаб қилиши таъкидланди. Бу ҳақда “Коммерсант” хабар берди.
Қурилиш соҳасидаги “Самолёт” гуруҳи компанияси синов тариқасида ишчиларни Ҳиндистондан олиб келмоқда.
Уларнинг ўзига хос хусусиятлари бор. Ҳозирча буни жуда муваффақиятли тажриба деб айтиб бўлмайди, лекин биз синаб кўряпмиз. Улар камроқ иш ҳақи талаб қилади. Катта афзаллиги шундаки, агар улар келиб, шартнома имзолаган бўлса, иш берувчини ўзгартира олмайди, дейди компаниянинг операцион директори Алексей Акиндинов.
Россиядаги бизнеслар сўнгги пайтларда Ҳиндистондан ишчи кучини фаол равишда изламоқда. Меҳнат бозорида МДҲ давлатларидан келган мигрантлар учун шароитлар камроқ жозибадор бўлиб бормоқда. Декабрь ойида онлайн-ритейлер Ozon омбор мажмуаларига Ҳиндистондан ишчиларни жалб этишни режалаштирганини маълум қилди. Кийим ишлаб чиқарувчилар ва етказиб бериш хизматларининг ҳам арзон ишчи кучига талаби ортмоқда.
Ҳиндистондан келадиган мигрантлар виза асосида келади. Ҳар қандай визали мигрант, мамлакатнинг ички ишлар ва хавфсизлик идоралари нуқтайи назаридан, патентли мигрантдан яхшироқ. Айни пайтда Ҳиндистондан ишчи кучи таклифи талабни анча ортда қолдиради. Менимча, ҳиндистонлик қурувчилар ишлаётган объектлар сони ортади, деган Қурувчилар миллий бирлашмаси президенти Антон Глушков.
У салбий жиҳатларга тил бўйича тўсиқ, ишчи малакаси даражасига оид саволлар ва иш берувчи ҳамда ходим ўртасидаги ўзаро муносабатларга бошқача ёндашув каби омилларни киритди.
Изоҳ (0)