Тошкент шаҳрида 2 кишини ҳажга жўнатиш учун салкам 13 минг доллар олган турфирма ходимлари ушлангани маълум қилинди.
Келтирилишича, Давлат хавфсизлик хизматининг Сирдарё вилояти бўйича бошқармаси ходимлари томонидан ички ишлар органлари билан ҳамкорликда ўтказилган тезкор тадбирда Тошкент шаҳрида фаолият юритувчи туристик фирма ишчиси бўлган шахс Боёвут туманида яшовчи 2 нафар фуқарони Саудия Арабистонига ҳаж зиёратига юбориш эвазига 12 800 АҚШ доллари олган вақтида ушланган.
Терговга қадар текширув давомида мазкур турфирманинг 2 нафар ходими ҳам фуқароларнинг ишончига кириб, зиёратга юбориш баҳонасида уларнинг пулларини фирибгарлик йўли билан ўзлаштириш механизмини жорий қилгани аниқланди.
Ҳолат юзасидан Жиноят кодексининг 168-моддаси 3-қисми “а” банди билан жиноят иши қўзғатилиб, қонунбузарларнинг 2 нафарига нисбатан қамоқ эҳтиёт чораси қўлланди.
Ҳозирда тергов ҳаракатлари олиб борилмоқда ва улардан жабр кўрган бошқа фуқароларнинг шахсига аниқлик киритиш бўйича зарур чора-тадбирлар кўрилмоқда.
ДХХ Фарғона вилояти бўйича бошқармаси ҳамда вилоят ички ишлар бошқармаси ходимлари ҳамкорлигида ўтказилган тезкор тадбирда эса Марғилон шаҳрида яшовчи шахс Тошлоқ туманида яшовчи фуқарони ҳаж амалларини адо этиш учун сафарга юбориш эвазига 11 минг АҚШ доллари олган вақтида ашёвий далиллар билан ушланди.
Ҳозирда ҳолат юзасидан мазкур шахсга нисбатан Жиноят кодексининг 25,168-моддаси 3-қисми “а” банди билан жиноят иши қўзғатилиб, тергов ҳаракатлари олиб борилмоқа.
Ҳаж ва умра тадбирларини ташкил этиш
Ҳаж зиёратига бориш учун рухсатнома олиш талаб этилади. Ҳар йили ажратилган квоталар асосида номзодлар тасдиқланади. Тасдиқланган номзодлар сафар ҳужжатларини расмийлаштиради.
2024 йил июлида Ўзбекистонда умра тадбирларини ташкил этиш ва ўтказиш лицензияланадиган фаолиятнинг алоҳида тури сифатида белгиланган. Лицензияга эга бўлмаган тадбиркорлик субъектлари томонидан умра хизматларини кўрсатиш тақиқланган. Бундай ҳуқуқбузарликлар учун юридик шахсларга солинадиган жарималар миқдорлари БҲМнинг 200 баравари (75 миллион сўм) этиб белгиланган.
Бу борадаги фирибгарликлар:
- Тошкентда тўрт кишини 26 минг доллар эвазига ҳажга ноқонуний юбормоқчи бўлган турфирма ходимлари ушланди
- Тошкентда тўрт кишини ҳажга жўнатиш учун 23,6 минг доллар олган шахс ушланди
- Тошкентда 4 кишини ҳажга жўнатиш учун 27,2 минг доллар олаётган турфирма ходими ушланди
- Наманган, Хоразм, Фарғонада ҳаж ва умрага ноқонуний юбормоқчи бўлганлар ушланди (видео)
Изоҳ (0)