Hozirgi kunda ko‘pchilik odamlar uyqudan avval smartfonidan foydalanishga odatlanib qolgan: kimdir ijtimoiy tarmoqlarga ko‘z yugurtiradi, kimdir esa budilnik yoki meditatsiya ilovalarini yoqib qo‘yadi. Natijada telefonlar ko‘pincha yotoq yonida yoki yostiq ostida qolib ketadi. Ayniqsa, telefon zaryad olayotgan bo‘lsa, bu holat xavfsizlik jihatidan savollar tug‘dirishi mumkin. Haqiqatan ham, zaryadkada turgan telefon bilan birga uxlash sog‘liq yoki qurilma uchun xavfsizmi?
Aslida agar asosiy ehtiyot choralariga amal qilinsa, zaryadkada turgan telefon yonida uxlash zararsiz sanaladi. Zamonaviy smartfonlar va zaryad qurilmalari haddan tashqari qizib ketish yoki ortiqcha yuklanishga qarshi himoya tizimi bilan jihozlangan, shuning uchun yong‘in chiqish xavfi juda past, lekin butunlay yo‘q emas.
Eng ko‘p uchraydigan xatolardan biri telefonni yostiq ostiga, ko‘rpa tagiga yoki tanaga yaqin joyga qo‘yishdir. Bu gadjetdagi ortiqcha issiq haroratning chiqib ketishiga to‘sqinlik qiladi. Ayniqsa, original bo‘lmagan yoki shikastlangan zaryad qurilmasi ishlatilganda smartfonning qizib ketish ehtimoli oshadi. Eng yomoni — uyquda tasodifan kabelni tortib yuborish. Keskin harakat natijasida ulagich, kabel yoki qurilma shikastlanishi, hattoki qisqa tutashuv yuzaga kelishi mumkin.
Zaryadkaga qo‘yilgan telefonning yonib ketish xavfini kamaytirish uchun quyidagi oddiy qoidalarga rioya qiling:
- Smartfonni qattiq yuzali va ochiq joyda, masalan, stol ustida zaryadlang.
- Uni yostiq yoki ko‘rpa bilan yopib qo‘ymang.
- Faqat sifatli va sertifikatlangan zaryad qurilmalaridan foydalaning.
- Kabelni tasodifan tortib yuborishingiz mumkin bo‘lgan joylardan uzoqroq tuting.
- Agar akkumulyator qiziy boshlasa, shishib ketsa yoki telefon yomon ishlay boshlasa, zaryadlashni to‘xtating va qurilmani mutaxassisga ko‘rsating.
Xulosa: zaryad olayotgan telefon yonida uxlash mumkin, ammo uni iloji boricha uzoqroqda tutish lozim. Uning qizib ketishi yoki shikastlanishiga sabab bo‘luvchi holatlarga yo‘l qo‘ymaslik tavsiya etiladi.
Izoh (0)