Хитойда давлат ва партия ходимларининг хулқ-атворига қўйиладиган талаблар кучайтирилди. Хусусан, иш вақтидаги тушликлар пайтида тансиқ таомлар тановул қилиш ва спиртли ичимликлар ичиш ман этилди. Қарор матни Давлат кенгашининг расмий веб-сайтида эълон қилинди.
Хитой Коммунистик партияси марказий қўмитаси ва ХХР Давлат кенгаши партия ва давлат муассасаларида қатъий тежамкорлик ва исрофгарчиликка қарши курашиш тўғрисида қарор қабул қилган. 18 май куни эълон қилинган ҳужжатда жами 63 та банд мавжуд бўлиб, улар амалдорларнинг хизмат сафарлари, расмий қабуллар, хизмат транспорт воситалари, анжуманлар ва тадбирлар ўтказиш, офис хоналари ва тежамкорлик муаммосига оид бошқа масалаларга доир хулқ-атвор қоидаларини тавсифлайди.
“Иш жойидаги тушлик пайтида нозик таомлар тортилмаслиги, сигарет ва спиртли ичимликлар берилмаслиги керак”, дейилади бандлардан бирида.
Шунингдек, янги қоидалар давлат ва партия ходимларининг хорижий хизмат сафарларига оид хатти-ҳаракатларини батафсил тартибга солади. Хусусан, амалдорларга аниқ мазмун ва мақсадга эга бўлмаган хизмат сафарларини ташкил этиш, шунингдек, “ниқобланган туризм”нинг ҳар қандай шакли қатъиян тақиқланди.
Хизмат сафарига жўнаётган амалдорларга қабул қилувчи томонга одатий расмий тадбирлардан ташқари илтимослар билан мурожаат қилиш, шунингдек, пул совғалари, эсдалик совғалари, маҳаллий ноёб таомларни қабул қилиш тақиқланди. Хорижда қимор ўйинларида иштирок этиш тақиқлангани алоҳида таъкидланган.
Қарорда Хитойда хорижий меҳмонларни қабул қилиш қоидалари ҳам баён этилган. Хусусан, хорижий меҳмонларни қабул қилиш дипломатик, дўстона тенглик, прагматизм ва тежамкорлик тамойиллари асосида амалга оширилиши қайд этилган. Қабул қилувчи томон, ҳужжатда таъкидланганидек, “хорижий меҳмонлар гуруҳларини қабул қилиш харажатларини қатъий назорат қилиши” лозим.
Таъкидланишича, мамлакатнинг барча ҳудудларидаги ва барча даражадаги маъмурий органлар исрофгарчилик уят, тежамкорлик эса қадр-қиммат ва шараф ҳисобланган муҳитни пухта тарғиб қилишлари зарур.
Изоҳ (0)