Ижтимоий тармоқларда пенсия тизими хусусий секторга берилиши режалаштирилаётгани ҳақида хабарлар тарқалди. Стратегик ислоҳотлар агентлиги мазкур хабарлар асоссиз эканлигини маълум қилди.
“Пенсия тизимига хусусий секторни жалб қилиш таклифи давлат иштирокидаги пенсия фондини бекор қилишни назарда тутмайди”, дейилади агентлик хабарида.
Қайд этилишича, ушбу масала халқаро экспертлар томонидан пенсия тизимини ислоҳ қилиш юзасидан таклиф этилган бир қатор тавсиялардан бири бўлиб, ҳозирда ушбу таклифлар Стратегик ислоҳотлар агентлиги ва бошқа тегишли идоралар томонидан ўрганилмоқда.
Шу билан бирга, пенсия тизимига оид ҳар қандай ўзгаришлар халқаро тажриба таҳлили, шунингдек, аҳоли фикри ва эҳтиёжларини чуқур ўрганиш асосида шакллантирилиб, барча ташаббуслар жамиятнинг ижтимоий ҳимоясини кучайтиришга қаратилади.
13 май куни Стратегик ислоҳотлар агентлигида Халқаро маслаҳатчилар кенгаши аъзолари билан учрашув бўлиб ўтганди. Унда 2025 йилга мўлжалланган қўшма дастур доирасида тайёрланган ташаббуслар муҳокама қилинган. Хусусан, ХМК вакиллари пенсия тизимининг жорий моделини қайта кўриб чиқиш зарурлигини таъкидлаб, молиявий барқарорликни таъминлаш мақсадида 6 та асосий йўналишни ўз ичига олган пенсия ислоҳоти режасини ишлаб чиқди.
Улар қаторига пенсия жамғармасига бадаллар тўланган давр асосида “суғурта стажи” тизимини жорий этиш, пенсия хизматларини кўрсатишнинг барча босқичларини рақамлаштириш, ихтиёрийлик ва жамғариб бориш тамойилларига асосланган хусусий пенсия жамғармаларини ташкил этиш киради. Кенгаш бу йўналишда 5 та қонунни қабул қилишни таклиф қилди.
Ўзбекистондаги пенсия тизими ҳақида
-PRflIr3l.avif)
Мамлакатда пенсия тизими икки асосий устунга таянади: давлат томонидан молиялаштириладиган пенсия тизими ва мажбурий жамғариб бориладиган пенсия тизими.
Давлат пенсия тизими “Фуқароларнинг давлат пенсия таъминоти тўғрисида”ги қонун асосида фаолият юритади. Ушбу тизим қуйидаги пенсия турларини ўз ичига олади:
- ёшга доир пенсия (эркаклар учун 60 ёшда камида 25 йиллик меҳнат стажи, аёллар учун 55 ёшда камида 20 йиллик меҳнат стажи талаб этилади);
- ногиронлик пенсияси (меҳнатга лаёқатсизлик ҳолатларида тайинланади);
- боқувчисини йўқотганлик пенсияси (боқувчисини йўқотган оилаларга берилади).
Агар фуқаронинг меҳнат стажи етарли бўлмаса, пенсия ёши эркаклар учун 65 ёш, аёллар учун 60 ёш этиб белгиланади.
2004 йилдан бошлаб Ўзбекистонда мажбурий жамғариб бориладиган пенсия тизими жорий этилган. Ушбу тизимда ҳар бир фуқаро учун шахсий пенсия ҳисобварағи очилади ва иш берувчи томонидан маошнинг 1 фоизи миқдорида ажратмалар амалга оширилади. Бу маблағлар Бюджетдан ташқари пенсия жамғармасида жамланади. Фуқаро пенсия ёшига етганда ёки қонунчиликда белгиланган бошқа ҳолатларда ушбу жамғармадаги маблағлардан фойдаланиш ҳуқуқига эга бўлади.
Изоҳ (0)