Ўзбекистонда 2025 йил март ойида пенсия тўловларини нақдсиз шаклда олувчиларга маблағлар тўлиқ молиялаштирилди. Бу ҳақда Пенсия жамғармаси хабар берди.
Унга кўра, Пенсия жамғармаси томонидан жорий йилнинг март ойи тўлов рўйхатларига киритилган 4,1 млн нафар пенсия олувчилар учун талаб этилган маблағлар тижорат банкларига молиялаштирилиб берилди.
Ўз навбатида пенсия тўловларини нақд пулсиз шаклда олувчи 3,4 млн нафар (ёки жами олувчиларнинг 82 фоизи) фуқароларнинг банк карталарига маблағлар тўлиқ юклаб берилиши таъминланди.
Амалдаги қонунчилик талабларига мувофиқ пенсия пулларини нақд шаклда олувчиларга пенсия пуллари 4-март кунидан бошлаб тасдиқланган графикларга асосан Халқ банкининг сайёр кассалари томонидан етказиб берилиши айтилди.
Ўзбекистонда ёшга доир пенсия тайинлашда ўзгартиришлар киритилаётгани ҳақида хабар берилганди. 2025 йил 1 мартдан бошлаб пенсия ёшига етган фуқароларга пенсиялар “автоматик” тарзда, яъни ҳеч қандай ҳужжат талаб этмаган ҳолда ва фуқаронинг мурожаатисиз тайинланади. Фуқаронинг шахсига оид барча маълумотлар вазирлик ва идораларнинг электрон базаларидан олинади.
Шунингдек, пенсияга чиқмасдан иш фаолиятини давом эттириш истагида бўлган ёки пенсия миқдоридан норози бўлган фуқароларга “автоматик” тайинланган пенсияни рад этиш ҳуқуқи берилмоқда.
Фуқаролар пенсия тайинланганидан, пенсия миқдоридан ёки пенсия тайинланиши рад этилганидан норози бўлган тақдирда Пенсия жамғармасининг туман (шаҳар) бўлимига тегишли тартибда ариза билан мурожаат қилиши мумкин.
Аввалроқ Иқтисодиёт ва молия вазирлиги Ўзбекистонда иш ҳақи, пенсия ва нафақалар 2025 йил 1 мартдан ва 1 августдан 10 фоизга оширилиши тўғрисида тарқалган хабарлар ҳақиқатга тўғри келмаслигини маълум қилганди.
Ўзбекистонда охирги марта 2024 йил сентябрда пенсиялар ва нафақалар 15 фоизга оширилган эди. Хусусан, пенсияни ҳисоблашнинг базавий миқдори ойига 428 минг сўм, ёшга доир энг кам пенсия миқдори ойига 834 минг сўм этиб белгиланди. 1 октябрдан бюджет ташкилотлари ходимларининг маоши 10 фоизга, ўқитувчилар ва тиббиёт ходимларининг маоши эса 15 фоизга кўтарилганди. Бунда меҳнатга ҳақ тўлашнинг энг кам миқдори – ойига 1 155 000 сўм, базавий ҳисоблаш миқдори — 375 000 сўм этиб белгиланганди.
2024 йилда Ўзбекистонда ўртача номинал (солиқ ва бошқа тўловларни ўзи ичига олган) ойлик иш ҳақи 5 миллион 357 минг сўмни ташкил этган.
Ўтган йил январь–декабрь ойларида ҳудудлар бўйича ўртача ойлик иш ҳақининг энг юқори кўрсаткичи доимгидек Тошкент шаҳри кузатилган — 9,1 миллион сўм. Кейинги ўринларда Навоий (6,7 миллион сўм), Тошкент (5,1 миллион сўм), Андижон (4,6 миллион сўм) ҳамда Бухоро (4, 3 миллион сўм) вилоятлари қайд этилган. Энг кам ўртача иш ҳақи Қашқадарё (3,8 миллион сўм), Сурхондарё (3,8 миллион сўм) ва Наманган (3,9 миллион сўм) вилоятларида кузатилган.
Изоҳ (0)