Ijtimoiy tarmoqlarda pensiya tizimi xususiy sektorga berilishi rejalashtirilayotgani haqida xabarlar tarqaldi. Strategik islohotlar agentligi mazkur xabarlar asossiz ekanligini ma’lum qildi.
“Pensiya tizimiga xususiy sektorni jalb qilish taklifi davlat ishtirokidagi pensiya fondini bekor qilishni nazarda tutmaydi”, deyiladi agentlik xabarida.
Qayd etilishicha, ushbu masala xalqaro ekspertlar tomonidan pensiya tizimini isloh qilish yuzasidan taklif etilgan bir qator tavsiyalardan biri bo‘lib, hozirda ushbu takliflar Strategik islohotlar agentligi va boshqa tegishli idoralar tomonidan o‘rganilmoqda.
Shu bilan birga, pensiya tizimiga oid har qanday o‘zgarishlar xalqaro tajriba tahlili, shuningdek, aholi fikri va ehtiyojlarini chuqur o‘rganish asosida shakllantirilib, barcha tashabbuslar jamiyatning ijtimoiy himoyasini kuchaytirishga qaratiladi.
13-may kuni Strategik islohotlar agentligida Xalqaro maslahatchilar kengashi a’zolari bilan uchrashuv bo‘lib o‘tgandi. Unda 2025-yilga mo‘ljallangan qo‘shma dastur doirasida tayyorlangan tashabbuslar muhokama qilingan. Xususan, XMK vakillari pensiya tizimining joriy modelini qayta ko‘rib chiqish zarurligini ta’kidlab, moliyaviy barqarorlikni ta’minlash maqsadida 6 ta asosiy yo‘nalishni o‘z ichiga olgan pensiya islohoti rejasini ishlab chiqdi.
Ular qatoriga pensiya jamg‘armasiga badallar to‘langan davr asosida “sug‘urta staji” tizimini joriy etish, pensiya xizmatlarini ko‘rsatishning barcha bosqichlarini raqamlashtirish, ixtiyoriylik va jamg‘arib borish tamoyillariga asoslangan xususiy pensiya jamg‘armalarini tashkil etish kiradi. Kengash bu yo‘nalishda 5 ta qonunni qabul qilishni taklif qildi.
O‘zbekistondagi pensiya tizimi haqida
-PRflIr3l.avif)
Mamlakatda pensiya tizimi ikki asosiy ustunga tayanadi: davlat tomonidan moliyalashtiriladigan pensiya tizimi va majburiy jamg‘arib boriladigan pensiya tizimi.
Davlat pensiya tizimi “Fuqarolarning davlat pensiya ta’minoti to‘g‘risida”gi qonun asosida faoliyat yuritadi. Ushbu tizim quyidagi pensiya turlarini o‘z ichiga oladi:
- yoshga doir pensiya (erkaklar uchun 60 yoshda kamida 25 yillik mehnat staji, ayollar uchun 55 yoshda kamida 20 yillik mehnat staji talab etiladi);
- nogironlik pensiyasi (mehnatga layoqatsizlik holatlarida tayinlanadi);
- boquvchisini yo‘qotganlik pensiyasi (boquvchisini yo‘qotgan oilalarga beriladi).
Agar fuqaroning mehnat staji yetarli bo‘lmasa, pensiya yoshi erkaklar uchun 65 yosh, ayollar uchun 60 yosh etib belgilanadi.
2004-yildan boshlab O‘zbekistonda majburiy jamg‘arib boriladigan pensiya tizimi joriy etilgan. Ushbu tizimda har bir fuqaro uchun shaxsiy pensiya hisobvarag‘i ochiladi va ish beruvchi tomonidan maoshning 1 foizi miqdorida ajratmalar amalga oshiriladi. Bu mablag‘lar Byudjetdan tashqari pensiya jamg‘armasida jamlanadi. Fuqaro pensiya yoshiga yetganda yoki qonunchilikda belgilangan boshqa holatlarda ushbu jamg‘armadagi mablag‘lardan foydalanish huquqiga ega bo‘ladi.
Izoh (0)