Польшанинг Варшава шаҳри мезбонлик қилаётган World Boxing ташкилоти кубоги иккинчи босқичининг илк кунида ўзбекистонлик 3 нафар боксчи рингга чиқиб, уларнинг барчаси ғалаба қозонди.
Ушбу мусобақа 10—17 май кунлари Варшавадаги COS Торwар мажмуасида бўлиб ўтади. Турнирда Ўзбекистон терма жамоаси 9 нафар боксчи билан қатнашмоқда.
Тўлиқ таркиб:
-55 кг: Миразизбек Мирзаҳалилов
-60 кг: Самандар Олимов
-65 кг: Асадхўжа Мўйдинхўжаев
-70 кг: Гофур Тоҳиров
-75 кг: Фазлиддин Эркинбоев
-80 кг: Жавоҳир Умматалиев
-85 кг: Акмалжон Исроилов
+92 кг: Жаҳонгир Зокиров
-57 кг: Хуморабону Мамажонова
Кеча, 12 май куни ўзбекистонлик боксчилар мусобақадаги иштирокини бошлади. Кун давомида 3 нафар спортчи рингга чиқиб, барчасида ғалаба қозонишни уддалади.
Дастлаб, -60 кг вазнда рингга кўтарилган Самандар Олимов мезбон Майкл Акото-Ампавни 5:0 ҳисобида мағлуб этиб, чорак финалга йўл олди. Кейин Асадхўжа Мўйдинхўжаев ҳам -65 кг вазнда швециялик Ҳампус Бромандан 5:0 ҳисобида устун келиб, кейинги босқич иштирокчисига айланди. Куннинг сўнгги баҳсида Жаҳонгир Зокиров рингга чиқди. У +90 кг вазн тоифасида яна бир мезбон — Оскар Коперани иккинчи раундда техник нокаутга учратди.
Маълумот учун, 31 мартдан 5 апрелга қадар бўлиб ўтган World Boxing ташкилоти кубогининг дастлабки босқичига Бразилиянинг Фос-ду-Игуасу шаҳри мезбонлик қилган. Мазкур мусобақада Ўзбекистон терма жамоаси медал жамғариш бўйича биринчи ўринни эгаллаган эди.
Изоҳ (0)