Ёшлар ўртасидаги жаҳон чемпионатининг илк кунида 5 нафар ўзбекистонлик боксчи ғалаба қозонди

Россиянинг Санкт-Петербург шаҳридаги «Сибур Арена» мажмуасида AIBA Youth World Boxing Championships — бокс бўйича ёшлар ўртасидаги жаҳон чемпионати бошланди. Бу ҳақда «Оламспорт» хабар бермоқда.

17–18 ёшли боксчилар ўртасида ўтаётган жаҳон чемпионатида дунёнинг 75 давлатидан 402 нафар чарм қўлқоп устаси 10 та вазн тоифасида иштирок этмоқда. Ўзбекистон терма жамоаси аъзолари барча вазн тоифаларида қатнашмоқда.

Мусобақанинг илк куни рингга кўтарилган 5 нафар ўзбекистонлик боксчининг барчаси рақибларини катта устунлик билан мағлубиятга учратди.

-52 килограмм вазнда қатнашаётган Отабек Холматов илк жангида қирғизистонлик Фатхиддин Ҳамроевдан 4:1 ҳисобида устун келди.

-64 килограмм вазн тоифасида Беҳруз Раҳмонов биринчи беллашувида озарбайжонлик Бахтиёр Газибаевга ҳеч қандай имконият қолдирмади — 5:0.

Яна бир ўзбекистонлик боксчи, -69 килограмм вазндаги Улуғбек Собиров ҳам худди шу ҳисобда япониялик рақиби Зен Куроянагини мағлубиятга учратди.

-75 килограмм вазн тоифасида ўз имкониятини синовдан ўтказаётган Шоҳрузбек Рустамов ҳам жаҳон чемпионатидаги иштирокини ғалаба билан бошлади. У беларуслик Ягор Скамарохни 5:0 ҳисобида енгди.

-81 килограмм вазндаги Санжар Турсунов эса литвалик Виландас Валчиукасни 5:0 ҳисобида мағлуб этди.