World Boxing президенти Борис ван дер Ворст кеча, 7 октябрь куни Ўзбекистон Миллий Олимпия қўмитасига ташриф буюрди.
Дастлаб Ван дер Ворстга МОҚнинг фаолияти, ўзбек спортининг шонли тарихи ҳақида маълумот берилди. Шундан сўнг Ван дер Ворст ва спорт вазири Адҳам Икрамов, МОҚ бош котиби Ойбек Касимов, қўмита раиси ўринбосари, мамлакат бокс федерацияси раисининг биринчи ўринбосари Сакен Полатов ҳамда МОҚ раиси ўринбосари Шерзод Ташматов иштирокида учрашув ўтказилди.
Йиғилишда World Boxing президенти ташкилот фаолияти, унинг мақсадлари ҳақида маълумот берди. Унга кўра, бугунги кунга келиб 49 давлат ушбу халқаро федерацияга аъзо бўлиб, бокс ривожи бўйича келгусида қатор истиқболли лойиҳалар режалаштирилган.
Суҳбат давомида бокс бўйича Ўзбекистон эркаклар терма жамоасининг Париж—2024 ёзги Олимпия ўйинларида 7 та вазндан 5 тасида олтин медални қўлга киритгани, бугунги кунда Ўзбекистон бокс оламида жаҳонда етакчилардан бири экани ҳам тилга олинди. Қолаверса, расмийлар бокснинг Лос-Анжелес—2028 ёзги Олимпия ўйинлари дастурида сақланиб қолиши тарафдори эканини билдиришди.
Маълумот учун, аввалроқ Қозоғистон ҳам IBA’ни тарк этиб, янги тузилган бокс ташкилотига аъзо бўлиш учун ариза топширгани маълум қилинганди.
Ўзбекистон МОҚ бош котиби Ойбек Касимов World Boxing билан музокаралар олиб борилаётганини таъкидлаган эди.
Изоҳ (0)