Халқаро Олимпия Қўмитасининг (ХОҚ) Грециянинг Коста-Наварино шаҳрида бўлиб ўтган 144-сессиясида бокснинг 2028 йилги Лос-Анжелес Олимпиадаси дастурига расман қайтарилиши бўйича якуний қарор қабул қилинди. Бу ҳақда Миллий Олимпия Қўмитаси хабар бермоқда.
Дастлаб, бокс 2028 йилги Олимпия ўйинлари мусобақалари рўйхатидан чиқарилган эди. Бунга Халқаро бокс ассоциацияси (IBA) атрофида юзага келган муаммолар сабаб бўлган. ХОҚ 2023 йил июнь ойида IBAни тан олишни расман бекор қилгач, Олимпиадада бокс мусобақаларининг ўтказилиши сўроқ остида қолган эди.
Шунга қарамай, Париж-2024 Олимпиадасида бокс мусобақалари ХОҚнинг махсус ишчи гуруҳи назорати остида ўтказилди.
Эндиликда Лос-Анжелес Олимпиадасида бокс мусобақалари 2023 йилда ташкил этилган World Boxing федерацияси томонидан бошқарилади. Ҳозирда ушбу ташкилот таркибида 84 миллий федерация бор ва яқинда ХОҚ томонидан вақтинчалик тан олинган.
Изоҳ (0)