Buyuk Britaniya bosh vaziri Kir Starmerning xususiy uyida 12-mayga o‘tar kechasi yong‘in sodir bo‘ldi. Binoga o‘t qo‘yishda gumon qilinayotgan 21 yoshli shaxs qo‘lga olindi. Bu haqda Sky News xabar berdi.
Ma’lum bo‘lishicha, uy Londonning Kentish-Taun rayonida joylashgan va yong‘inda uning eshigiga zarar yetgan. Starmer va uning oilasi 2024-yil iyulidan beri Dauning-stritdagi bosh vazirning rasmiy qarorgohida yashamoqda.
Aksilterror politsiyasi yong‘in tafsilotlarini o‘rganishga kirishgan, chunki gap yuqori martabali jamoat arbobi bilan bog‘liq bo‘lgan bino haqida ketmoqda, deyiladi xabarda.
Politsiya, shuningdek, 11-may kuni Islingtondagi uyda sodir bo‘lgan yong‘inni tekshirmoqda, unda ham kirish eshigi yonib ketgan. Bu uy ham Starmer bilan bog‘liq bo‘lishi mumkin.
Surishtiruv davomida, 8-may kuni Kentish-Taun hududida avtomobilning yonib ketishi ham tekshirilmoqda. Politsiya uchta yong‘in o‘rtasida bog‘liqlik borligini taxmin qilmoqda. 13-may kuni Britaniya politsiyasi bu yong‘inlarga aloqadorlikda gumon qilinayotgan 21 yoshli erkakni qo‘lga olgan. Hozircha boshqa tafsilotlar keltirilmagan.
Britaniya bosh vaziri avariya-qutqaruv xizmatlariga minnatdorlik bildirdi. Bosh vazirning rasmiy vakili tafsilotlarni keltirishdan bosh tortdi, jumladan, yong‘in boshlangan paytda binolarda kimlar bo‘lishi mumkinligiga aniqlik kiritmadi. Ichki ishlar vaziri Ivett Kuper ham tergov jarayoniga izoh bermadi.
Izoh (0)