Покистон ҳаво ҳудудининг ёпилиши авиачипталар нархи қимматлашишига олиб келиши мумкин

Uzbekistan Airways Миллий авиакомпаниясининг харажатлари Покистон ҳаво қатновининг ёпилиши оқибатида икки баравар ошди, деб хабар берди «Газета.uz».

27 февралдан бошлаб Покистон фуқаролик авиацияси бошқармаси қарорига кўра Ҳиндистон—Покистон келишмовчилигининг кучайиши оқибатида мамлакат ҳаво ҳудуди 12 мартгача барча транзит рейслари учун ёпилган эди.

Шу сабабли Uzbekistan Airways Ҳиндистон (Дели, Амритсар, Мумбай)га, шунингдек, Жануби-Шарқий Осиё шаҳарлари (Бангкок, Куала-Лумпур, Сингапур)га бориши учун Покистон ҳаво ҳудудини айланиб ўтиб, Туркманистон ва Эрон орқали боришга мажбур бўлмоқда. Оқибатда парвоз вақти узайиб, йўл учун сарфланадиган ёқилғи харажати ҳам ортган.

Хабарда айтилишича, Uzbekistan Airways агар Покистон ҳаво ҳудуди бундан кейин ҳам ёпиқ қолса, авиачипталар нархини қайта кўриб чиқишга тўғри келишини маълум қилган.

Шунингдек, МАК юзага келган вазият сабабли бошқа мамлакатлар каби ушбу йўналишлар бўйича парвозларни бекор қилмаганини таъкидлаган.