Pokiston va Hindiston o‘rtasidagi chegara hududlarida yuzaga kelgan beqaror vaziyat tufayli 8–9-may kunlari HY461/462 reyslari (Toshkent—Laxor—Toshkent yo‘nalishi) majburiy bekor qilinadi. Bu haqda Uzbekistan Airways matbuot xizmati xabar berdi.
Bekor qilingan reys yo‘lovchilari chipta narxini qaytarib olish yoki jarimasiz tarzda boshqa sanalarga qayta bron qilish uchun murojaat qilishlari mumkinligi taʼkidlandi.
Aviakompaniya, shuningdek, Yaqin Sharq va Osiyo-Tinch okeani mintaqasi yo‘nalishlarida parvozlar jadvaliga o‘zgartirishlar kiritilishini maʼlum qildi.
Taʼkidlanishicha, parvozlar xavfsizligini maksimal darajada taʼminlash maqsadida, shuningdek, Pokiston va Hindiston chegarasi yaqinidagi havo hududidan vaqtincha o‘tishga qo‘yilgan cheklovlar sababli Deli, Mumbay, Bangkok, Kuala Lumpur, Pxuket kabi shaharlar yo‘nalishidagi reyslarning marshrutlari o‘zgartiriladi.
Shaharlar ro‘yxati yangilanishi, marshrutlarga qo‘shimcha tuzatishlar kiritilishi mumkinligi qo‘shimcha qilingan. Dastlabki ma‘lumotlarga ko‘ra, uchish vaqti 1,5 soat va yo‘nalishga qarab undan ortiqqa uzayishi mumkin.
Hindiston va Pokiston bir-biriga aviazarba yo‘lladi
Hindiston rasmiylari 7-mayga o‘tar kechasi Pokistondagi, shuningdek, Kashmirning Pokiston qismidagi “terrorchilik” infratuzilmasiga hujum qilib, “Sindur” operatsiyasini boshlaganini e’lon qildi. Hujumda faqat “terrorchilik” obyektlari nishonga olingani da’vo qilindi. Pokiston mazkur ma’lumotni rad etib, zarbalar terrorchilarga emas, balki tinch aholi yashaydigan hududlarga berilganini ma’lum qildi.
Izoh (0)