Польша президентлигига номзод Гжегож Браун Катовице шаҳрида Европа Иттифоқи байроғини ерга улоқтириб, унда оёқларини артди. Шундан сўнг байроқни ёқиб юборган. Воқеа видеоси унинг Х ижтимоий тармоғидаги саҳифасига жойлаштирилди.
Таъкидланишича, ҳодиса Катовицедаги саноат вазирлигида содир бўлган. RMF 24 нинг хабар беришича, Браун у ерга парламент аъзоси сифатида “Польша кон саноатини тугатиш” масаласини ўрганиш учун ташриф буюрган.
Ижтимоий тармоқда эълон қилинган видеода кўринишича, у Европа Иттифоқи байроғини олиб, полга ташлайди, сўнгра уни оёқлари билан босиб ўтади.
“Бу ер Брюссел эмас, Польша!”, дея ёзди у ўз постига изоҳ сифатида.
Президентликка номзодни бир аёл тўхтатмоқчи бўлган, бироқ у жиддий қаршилик кўрсатган.
“Ўзингизга раҳмингиз келсин, агар уялмасангиз, Худодан қўрқинг. Бу — Польша, Брюссел эмас!”, деди Браун.
Шунингдек, у Польша мамлакатга “душман” ташкилотларнинг рамзларини кўрсатмаслиги кераклигини қўшимча қилган.
Аввалроқ Европарламент Браунни депутатлик дахлсизлигидан маҳрум қилганди, Варшава округ прокуратураси эса унга еттита жиноят бўйича айблов қўймоқчи.
Бундан олдин, Брауннинг митинги пайтида унинг тарафдорлари 2022 йилдан бери Бяла Подляска шаҳар ҳокимиятида осиғлиқ турган Украина байроғини юлиб олишган. Сиёсатчи бу ҳаракатни маъқуллаган ва бунинг учун жавобгарликни ўз зиммасига олган. У Украина байроғи ушбу давлатнинг энг яқин консуллигига етказилишини ваъда қилган.
Арманистон пойтахти Ереванда “арманлар геноциди” деб аталган воқеанинг 110 йиллигига бағишланган машъала юришида иштирокчилар Озарбайжон ва Туркия байроқларини ёқиб юборишганди.
Изоҳ (0)