UFC собиқ чемпиони Ҳабиб Нурмагомедов яна солиқ билан боғлиқ муаммолар сабаб эътибор марказида. “Маш на спорте” нашри хабарига кўра, спортчининг банкдаги ҳисоблари Россия Федерал солиқ хизмати томонидан блокланган. Сабаби, у 2024 йил учун даромад декларациясини ўз вақтида топширмаган.
Бу Ҳабибнинг молиявий муаммоларга дуч келиши бўйича илк ҳолат эмас. Ўтган йили ҳам суд ижрочилари Нурмагомедовнинг 79 миллион рублга тенг мол-мулкини хатлаган эди. Чунки унда 302 миллион рубль миқдоридаги солиқ қарзи мавжуд бўлган. Ўша вақтда Ҳабибнинг қуйидаги мол- мулклари мусодара мусодара қилиниши хавф остида қолган эди:
- Ferrari California Т (300 минг доллар)
- Mercedes-Benz AMG GT S (161 минг доллар)
- Mercedes-Benz S-Class (122 минг доллар)
- BMW 7 Series (101 минг доллар)
- Toyota Land Cruiser (85 минг доллар)
- Toyota Tacoma (44 минг доллар)
- Доғистондаги ҳашаматли уй
Бундан ташқари, Ҳабибга тегишли Eagle FC промоушени, унга алоқадор хайрия фонди ва шахсий ҳисоблар ҳам вақтинча блокланган эди. Аммо орадан бир ҳафта ўтиб, Нурмагомедов қарздорликни тўлиқ қоплаб, мол-мулкларига қўйилган чекловлар олиб ташланганди.
Эслатиб ўтамиз, Ҳабиб Нурмагомедов UFC’даги сўнгги жангини 2020 йил 24 октябрь куни UFC 254 турнирида ўтказган. У Жастин Гейджини иккинчи раундда бўйсундириш усули билан мағлуб этиб, фаолиятини 29 ғалаба (0 мағлубият) билан якунлаган эди. Ушбу жангдан сўнг у онасига берган ваъдаси туфайли фаолиятини якунлашини маълум қилган.
Изоҳ (0)