Август ва сентябрь ойларида Россия қуролли кучлари бўлинмалари Ўзбекистон, Тожикистон ва Қирғизистон ҳарбийлари билан қўшма машғулотлар ўтказади. Бу ҳақда «Известия» Россия Мудофаа вазирлигидаги манбаларга таяниб хабар берди.
Нашрнинг таъкидлашича, вазирлик томонидан тасдиқланган режага кўра, машғулотларда асосий эътибор ноқонуний қуролланган гуруҳларга қарши курашга қаратилади. Бундан ташқари, қўшинлар минтақадаги вазиятни беқарорлаштиришга қаратилган уринишларга қарши кураш бўйича машғулотлар ўтайди.
Машғулотлар туркуми Шанхай ҳамкорлик ташкилоти мамлакатлари қуролли кучларининг «Тинчлик миссияси-2021» қўшма стратегик манёврлари билан якунланади.
Россия томондан 15-тинчликпарварлик ва 55-тоғли моторли милтиқ бригадалари кучлари, шунингдек, 31-алоҳида десант-ҳужум бригадасининг ҳарбий-ҳаво қисмлари жалб қилинади. Бундан ташқари, манёврларда 2 ва 24-алоҳида махсус мақсадли бригадалар гуруҳлари, шунингдек, қўшма қуролли армиялар махсус кучларининг алоҳида рота бўлинмалари иштирок этади.
Россиянинг Қирғизистон ва Тожикистондаги авиабазалари ҳам жалб қилинади. Шунингдек, 201-ҳарбий базанинг бир қисми бўлган С-300 ҳаво ҳужумидан мудофаа тизимлари ҳам машғулотларда иштирок этади.
Айни пайтда Тожикистонда қўмондонлик-штаб машғулотлари ўтказилмоқда. Унда Россиянинг Тожикистондаги 201-ҳарбий базасидан мингга яқин ҳарбийлар иштирок этмоқда. Ўқув машғулотлари ҳафта охиригача давом этади.
Тожикистон ҳудудидаги 201-ҳарбий база Россиянинг ўз чегараларидан ташқаридаги энг йирик ҳарбий объекти ҳисобланади. У Душанбе ва Бохтар шаҳарларида жойлашган. 2012 йилда ушбу базанинг 2042 йилгача Тожикистонда қолиши тўғрисида қарор қабул қилинди. Унинг таркибига моторли милтиқ, артиллерия, разведка, зенит-ракета ва бошқа қисмлар киради. 2015 йил сентябрь ойидан бошлаб таркибга ҳарбий ҳаво гуруҳи ҳам қўшилди. 2020 йилда базага 20 га яқин янги ва модернизация қилинган ускуналар, жумладан, Ми-8-МТВ5-1 ташувчи жанговар вертолётлари, пиёдалар учун модернизация қилинган БМП-2М жанговар машиналари қабул қилинди.
Аввалроқ Россия Афғонистондаги вазият туфайли Тожикистондаги ҳарбий базасидан фойдаланишга тайёрлигини билдирганди.
Мавзуга доир:
- Афғонистондаги вазиятнинг кучайиши фонида Россия ҳарбийлари Тожикистонда ўқув машғулотларини бошлади
- Эмомали Раҳмон тожик-афғон чегарасини мустаҳкамлаш учун армия резервидаги 20 минг нафар ҳарбий хизматчини сафарбар этди
- Путин афғон-тожик чегарасидаги вазиятнинг кескинлашуви муносабати билан Тожикистонга ёрдам беришни ваъда қилди
Изоҳ (0)