Туркиянинг Истанбул шаҳрида 2 ёшли болага зўравонлик қилган ўзбекистонлик энага қўлга олинди. Бу ҳақда DHA агенлиги хабар берди.
Маълум қилинишича, воқеа 25 апрель куни Истанбулнинг Фотиҳ туманида юз берган. Ўзбекистонлик аёл М.И. ўз уйида икки ойдан буён энагалик қилиб келган. У ўзбекистонлик оиланинг 2 ёшли фарзандига қараб туришга рози бўлган. Болага қараш давомида унга куч ишлатиб, калтаклаб, тепган.
Унинг уйида бўлган бошқа фуқаро бунга гувоҳ бўлиб, аёлнинг ҳаракатларини видеога ёзиб олган ва бу ҳақда полицияга хабар берган.
Шундан сўнг уйга ҳуқуқ-тартибот ходимлари келиб, уни қўлга олган. Уйда жами 7 нафар бола бўлган — 2 нафари аёлнинг фарзандлари, қолган 5 нафари қўшнисининг болалари.
Иш терговдан сўнг судга оширилган.
Апрель ойининг ўрталарида Туркиянинг Истанбул шаҳрида ўзбекистонлик 28 ёшли аёл турмуш ўртоғини пичоқлаб ўлдиргани ҳақида хабарлар таралганди. Дастлабки маълумотларга кўра, вафот этган Туркия фуқароси спиртли ичимлик истеъмол қилган. У ўзбекистонлик турмуш ўртоғига нисбатан мунтазам равишда жисмоний ва руҳий босим ўтказиб келган.
Изоҳ (0)