Ҳукумат қарори билан “Хоразм вилоятида янги меҳмонхона қуриш ва уни жиҳозлаш учун инвесторларга Ўзбекистон Республикасининг Давлат бюджетидан субсидия ажратиш тартиби тўғрисида”ги вақтинчалик низом қабул қилинди. Бу ҳақда Адлия вазирлиги хабар берди.
Низом Хоразм вилоятида президент қарорида белгиланган муддатларда (2025 йил 1 январдан 2026 йил 31 декабргача) инвесторлар томонидан янги меҳмонхона қуриш ва уни жиҳозлаш харажатларининг бир қисмини қоплаш мақсадида бюджетдан субсидия ажратиш тартибини белгилайди.
Субсидия қуйидаги миқдорларда ажратилади:
- тоифасиз меҳмонхонадаги ҳар бир хона учун — 10 млн сўм;
- 1 юлдузли тоифага эга меҳмонхонадаги ҳар бир хона учун — 15 млн сўм;
- 2 юлдузли тоифага эга меҳмонхонадаги ҳар бир хона учун — 20 млн сўм.
Бунда меҳмонхона камида 2 қаватдан иборат бўлиши лозим. Меҳмонхона субсидия ажратилган даврдан бошлаб 5 йилдан кам бўлмаган муддатда фаолият юритиши, тоифали меҳмонхона бўлган тақдирда, камида 5 йил ушбу тоифани сақлаб қолиши лозим.
Ўзбекистонда ипотека кредитлари бўйича дастлабки бадал ва фоиз тўловларининг бир қисмини қоплаш учун субсидиялар оширилиши ҳақида хабар берилганди.
Изоҳ (0)